Jańa nysan XVIII ǵasyrdan kórinis beretin keshen Ahmet Iаsaýı kesenesiniń janynda ornalasqan.
Etnoaýyl qazaq dalasynyń XVIII-XIX ǵasyrdaǵy ómirin beıneleıtin joba sanalady. «Áziret Sultan» mádenı qoryǵynyń býferlik aımaǵy men Ahmet Iаsaýı kesenesiniń bekinis qabyrǵasy, etnografııalyq murajaıdyń ortasynda oryn tepken. Interaktıvti etno-aýyldyń aýdany 16 myń sharshy metrdi quraıdy. Kesenege kelýshiler qazaq halqynyń baı mádenıetimen tanysyp, tipti kóne zattardy qoldarymen ustaı alady. Kóshpediler órkenıetinen kórinis beretin etnoaýyldyń aımaǵynda qazaq dalasyndaǵy tutas bir dáýir beınelengen.
«Etnoaýyl arqyly XVIII-XIX ǵasyrdyń atomosferasyn kórsettik. Gastronomııalyq aımaqta Orta Azııa elderine tıesili aspazdyq ónerdi kórýge bolady. 7,8,12 qanatty kıiz úıler men «han saraıy» tigilgen. Aýyl mańynda jylqylardyń «Tabyn» músindik kompozısııasy beınelengen. Ejelgi qudyq, sadaqshylarǵa arnalǵan atys tıri de qoıylǵan. Birneshe aımaqqa bólingen aýyldyń jalpy kólemi 3 gektar. Joba etnograftardyń, tarıhshylardyń aqyl-keńesi boıynsha jasalǵan. Bul jerde babalardyń zamanyn tek kórip qana qoımaı, aspazdarmen birge tamaq pisirip, sheberlermen birge túıin túıýge múmkindik bar. Túrli kórinister túsirýge bolady», dedi jobanyń uıymdastyrýshysy Aıko Tóken.
Interaktıvti rejımde ejelgi ádet-ǵuryptar men dástúrlerdi qalpyna keltirýdi kózdeıtin etnomádenı ortalyq jumys isteıdi. Kelýshiler saýda bazaryn, ejelgi qudyq, qolóner sheberhanalary syndy kóne kezeńniń kórinisterin kózben kóre alady. Baǵzy zamannyń ádisimen aǵash óńdeý, toqyma toqý jáne kıiz basý, qysh, zergerlik sheberhana, tas qalaýdyń qalaı jasalatynyn da úırenýge múmkindik bar.
