«Jalpy óńdeý ónerkásibi boıynsha ósý 7,7 paıyzǵa deıin jedeldedi. 13 óńir óńdeý ónerkásibinde oń ósim kórsetti. Eń joǵarǵy ósý Almaty men Nur-Sultan qalalarynda jáne Almaty oblysynda baıqalady. О́ńdeý ónerkásibinde tómendeý 4 óńirde baıqalyp otyr: Batys Qazaqstan, Atyraý, Túrkistan jáne Shyǵys Qazaqstan oblystarynda», dedi mınıstr.
Mınıstrdiń aıtýynsha, kóptegen óńirde joǵary ınvestısııalyq belsendilik bar. Eń joǵarǵy kórsetkish Almaty, Nur-Sultan qalalarynda, Túrkistan jáne Jambyl oblystarynda baıqalady. Tómendeý Batys Qazaqstan jáne Atyraý oblystarynda tirkeldi.
«Qurylys salasy joǵary ósý dınamıkasyn kórsetýde. Oryndalǵan qurylys jumystarynyń kólemi 12,5 paıyzǵa ulǵaıdy. Batys Qazaqstan oblysyn qospaǵanda, barlyq óńirler oń ósim kórsetti. Qurylys-montajdaý jumystarynyń joǵarǵy ósýi Túrkistan, Qyzylorda oblystarynda jáne Almaty qalasynda baıqalady», dedi ol.
Mınıstr turǵyn úı qurylysy belsendi júrgizilip jatqanyn atap ótti.
«Osy jylǵy qańtar-sáýir qorytyndysy boıynsha turǵyn úıdi paıdalanýǵa berý 13,3 paıyzǵa ósip, 3,5 mln sharshy metrdi qurady. Pavlodar jáne Almaty oblystarynan basqa barlyq óńirler oń ósim kórsetti», dedi Áset Erǵalıev.
