Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Armenııa Respýblıkasynyń qosylýy týraly 2014 jylǵy 10 qazandaǵy shartqa ózgerister engizý týraly hattamany ratıfıkasııalaý týraly» jáne «2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrdaǵy hattamaǵa ózgerister engizý týraly hattamany ratıfıkasııalaý týraly» zańdardy qarap, qabyldady.
Bul zańdar Armenııa men Qyrǵyzstannyń kedendik bajdaryn EAEO Biryńǵaı kedendik tarıfiniń mólsherlemesine kezeń-kezeńimen ıntegrasııalaýǵa múmkindik beredi. Soǵan baılanysty eki memleket úshin ótpeli kezeń 1 jylǵa neǵurlym sezimtal taýarlarǵa qatysty EAEO tarıfin tolyq ımplementasııalaýǵa deıin uzartylady.
«Búgin qabyldanǵan zańdar Qyrǵyz jáne Armenııa Respýblıkalarynyń aýmaqtaryna úshinshi elderden ákelinetin birqatar taýar tizbesi boıynsha kedendik-tarıftik retteý salasyn qamtıdy. Naqty aıtqanda, bul elder Eýrazııalyq ekonomıkalyq odaq sheńberinde qarastyrylǵan ýaqytsha jeńildikterdi áleýmettik-ekonomıkalyq jaǵdaıǵa baılanysty bir jylǵa uzartýdy suraǵan. О́tinishter tıisti deńgeıde qoldaý tapty. Jalpy, bul zańdar Eýrazııalyq ekonomıkalyq odaq aıasyndaǵy áriptestik pen yntymaqtastyq qatynastardy nyǵaıtýǵa oń septigin tıgizedi dep senemiz», dedi Máýlen Áshimbaev.
Sonymen qatar otyrys barysynda senatorlar depýtattyq saýaldaryn joldady. Aqylbek Kúrishbaev tuqym sharýashylyǵy jáne seleksııalyq ǵylym salasyndaǵy ózekti máselelerdi kóterse, Álimjan Qurtaev azamattardyń Ońtústikten Soltústikke kóshý baǵdarlamasyn iske asyrý kezindegi problemalarǵa nazar aýdardy.
