Jańa klýbtyń artyqshylyǵy – bul jerde balalardyń da, eresekterdiń de bos ýaqytyn ótkizýi úshin barlyq jaǵdaı jasalǵan. Jańa aýla klýbynda balalar men eresekterdiń sportpen, ıogamen aınalysýy, sol sııaqty doıby, shahmat, toǵyzqumalaq oınap, dombyra shertýi úshin múmkindik qarastyrylǵan. Qyzdar úshin aspazdyq kýrstar bar. Aýla klýbynyń ishinde kitaphana da bar.
«Úlken kisiler jastarǵa ylǵı da úlgi bolady. Munda olar óskeleń urpaqqa ómirdegi tájirıbesimen bólisip, olarmen birge doıby, shahmat, toǵyzqumalaq oınaıdy. Úrker eldi mekeninde kópbalaly otbasylar az emes. Bul aýmaqta shamamen 20 myń adam turady. Sol sebepti munda úlken aýla klýbyn qurý qajet boldy. Elorda ákimi Altaı Kólginovtiń tapsyrmasy boıynsha bul aýdanda bos ýaqyt ótkizý ortalyǵyn ashtyq», dep atap ótti Jastar saıasaty máseleleri basqarmasynyń basshysy Qaırat Qambarov.
Balalar men eresekter elordadaǵy aýla klýbtarynyń bárine tegin qatysa alady. Sonymen qatar jyl sońyna deıin elordada birqatar aýla klýbyn ashý josparlanyp otyr.
«Buryn úıirmelerge barý úshin qalaǵa avtobýspen qatynap, jolymyzdyń ózine bir saǵatymyz ketetin. Endi aýdanymyzdyń da óz aýla klýby bar. Men oǵan qatysyp qana qoımaı, eki kýrs usynǵym keledi. Birinshisi – balalarǵa arnalǵan akterlik sheberlik dárisi, ekinshisi – gıdroponıka úıirmesi. Onda biz sýda ósetin ósimdikterdi ǵana ósiremiz. Sol sııaqty ıdeıalardy júzege asyratyn eko-synybymyz bar», dep atap ótti Igor esimdi aýdan turǵyny.
Nur-Sultanda aýla klýbtarynyń sany edáýir artty. Qazirgi ýaqytta 28 aýla klýby jumys isteıdi, al onda shamamen úsh myń bala oqıdy.
Nur-Sultan qalasynyń ákimdigi Memleket basshysynyń tapsyrmasy boıynsha bos ýaqyt ortalyqtaryn qurýǵa, qoǵamdyq keńistikterdi (saıabaqtar, gúlzarlar, jelekjoldar), qala turǵyndarynyń sportpen shuǵyldanýyna, taza aýada bos ýaqytyn ótkizetin aýla aýmaqtaryn abattandyrýǵa erekshe kóńil bóledi. Bul jumys barlyq aýdanda, sonyń ishinde turǵyn alaptarynda júrgizilip jatyr.
