Qasym-Jomart Toqaev pen Anna Berde Qazaqstan men Dúnıejúzilik bank arasyndaǵy yntymaqtastyqtyń ózekti baǵyttaryn jáne aldaǵy ýaqyttaǵy kooperasııanyń basymdyqtaryn talqylady.
Memleket basshysy Nur-Sultan qalasyna kelgen Anna Berdege iltıpat bildirip, bul onyń Qazaqstan men Ortalyq Azııaǵa jasaǵan alǵashqy sapary ekenin atap ótti.
– Biz Dúnıejúzilik bankpen aradaǵy kópjyldyq seriktestikti joǵary baǵalaımyz. Osy ýaqyt aralyǵynda bank elimizge 6 mıllıard dollardan astam ınvestısııa quıdy. Qazirgi tańda sizdermen birlesip, ártúrli 12 jobany, atap aıtqanda, kólik, bilim berý, ekologııa jáne qarjy salalaryndaǵy bastamalardy júzege asyryp jatyrmyz, – dedi Qasym-Jomart Toqaev.
Memleket basshysy Dúnıejúzilik banktiń Qazaqstandaǵy birqatar ekologııalyq máseleni sheshýge úles qosqanyn, sonyń ishinde, «Syrdarııa ózeniniń arnasyn retteý jáne Soltústik Aral teńizin saqtap qalý» jobasynyń ekinshi kezeńine 1,5 mıllıard dollar kóleminde qarjylaı qoldaý kórsetkenin aıtty.
Osy rette Qasym-Jomart Toqaev ekologııalyq problemalardyń sheshilýine basa mán beretinin, «jasyl ekonomıka» máselelerine jáne atalǵan saladaǵy yqpaldastyqty jeke baqylaýyna alýǵa daıyn ekenin jetkizdi.
Anna Berde Qasym-Jomart Toqaevqa kezdesýge múmkindik jasaǵany jáne Dúnıejúzilik bankpen aradaǵy yntymaqtastyqty joǵary baǵalaǵany úshin rızashylyǵyn bildirdi. Sonymen qatar ol elimizde Qazaqstan Prezıdentiniń basshylyǵymen júzege asyrylyp jatqan reformalardy qoldaıtynyn aıtty.
