Pavlodar oblysynyń aqparat jáne qoǵamdyq damý basqarmasynyń málimeti boıynsha, ulttyq baıqaýdyń aımaqtyq kezeńi konkýrsqa ózin-ózi usyný jolymen, sondaı-aq jergilikti atqarýshy organdardyń, Qazaqstan Respýblıkasynyń zańnamasynda belgilengen tártippen tirkelgen zańdy tulǵalardyń usynýy boıynsha otbasylar qatysady.
– Konkýrsqa qatysýǵa eńbekte, sportta, shyǵarmashylyq, zııatkerlik, ǵylymı jetistikteri bar, sondaı-aq qoǵamdyq paıdaly qyzmetke qatysatyn (volonterlik, qaıyrymdylyq, mesenattyq, tálimgerlik) otbasylar jiberiledi. Oblystyq kezeńniń jeńimpaz otbasylaryna «Mereıli otbasy» laýreaty ataǵy, atap aıtqanda, dıplom jáne aıryqsha belgi (statýetka), beriledi. Sondaı-aq yntalandyrý syılyqtarmen marapattalady, – dep jazylǵan habarlamada.
Konkýrsty ótkizýdiń maqsattary:
- otbasy ınstıtýtyn, adamgershilikti, rýhanılyqty nyǵaıtý, erli-zaıyptylar arasyndaǵy jaýapkershilikti arttyrý;
- ata-analardyń bala tárbıeleýdegi jaýapkershiligin arttyrý;
- otbasylyq qundylyqtardy, kámeletke tolǵan balalarynyń eńbekke qabiletsiz jáne egde jastaǵy ata-analaryna qamqor bolýyn dáripteý jáne keńinen nasıhattaý;
- qazaqstandyq otbasynyń jaǵymdy ımıdjin nasıhattaý.
Esterińizge sala keteıik, «Mereıli otbasy» baıqaýy Qazaqstanda 2014 jyldan bastap ótkizilip jatyr. Onyń basty maqsaty – adamgershilik qundylyqtardy jańǵyrtý jáne otbasy men nekeniń jaǵymdy kórinisin qalyptastyrý.
