Pılottyq jobany qalalyq týrızm basqarmasy, Shymkent qalasy polısııa departamenti men qalalyq jolaýshylar kóligi jáne avtomobıl joldary basqarmasy birlese júzege asyrdy.
Týrıstik avtobýstarǵa arnalǵan «Bus Stop» turaqtary qala turǵyndary men qonaqtary úshin eń tartymdy degen oryndarda ashylýda. Alǵashqy núkte qalanyń ortalyq bóligi ál-Farabı alańynda ornalasqan. Munda kelgen týrıster «Arbat» alańy, «Shymkent Plaza» ortalyǵymen tanysa alady. Aldaǵy ýaqytta Báıdibek bı eskertkishi, Shymkent-Sırk, Naýryz alańy, Dendrosaıabaq jáne Ordabasy alańynda da arnaıy turaqtar paıdalanýǵa beriledi.
– Endi qalaǵa kelgen týrıster rýhanı-mádenı ortalyq aýmaǵynda ornalasqan avtoturaqtardy lezde taba alady. Mundaı ınfraqurylymnyń qajettiligi týraly qalalyq týroperatorlar kópten beri másele etip kótergen edi. Qalany týrıster úshin jaıly etý maqsatyndaǵy jumystar jalǵasady, – deıdi týrızm basqarmasynyń basshysy Oljas Shıntaev.
Qalanyń týrıstik áleýetin damytý baǵytyndaǵy «Bus Stop» turaqtary pılottyq joba aıasynda iske asyrylyp otyr.
