Kommýnaldyq qyzmetter 21 mamyr 22.00 men 22 mamyr 09.00 aralyǵynda sýmen jabdyqtaý jelilerinde jóndeý jumystaryn josparlap otyr:
Momyshuly dańǵyly men Tólebaev kóshesiniń qıylysynda jańa magıstraldy sý qubyryn ornatý;
Momyshuly dańǵyly men Sátbaev kóshesiniń qıylysyndaǵy qysym rettegishti jóndeý;
Momyshuly, 1 dańǵyly aýdanynda ólshegishti aýystyrý.
Osyǵan baılanysty aýyz sý berý ýaqytsha toqtatylady:
Esil aýdany boıynsha – Máńgilik El dańǵylynda, Nova city aýdanynda, Zarechnyı, Telmano jáne Prıgorodnyı turǵyn alaptarynda, BI Village Family Village-de, Qabanbaı batyr dańǵyly boıyndaǵy turǵyn úılerde.
Almaty aýdany boıynsha – Myńjyldyq alleıasy aýdanynda, Ońtústik-Shyǵys turǵyn alabynyń oń jaǵynda, Qaldaıaqov-Táýelsizdik-Panfılov-Amanjolov kóshelerinde.
Budan basqa, 22 mamyrda saǵat 10.00-den 17.00-ge deıin osy aýdandarda qubyr jelilerin iske qosý jumystaryna baılanysty sýdyń qysymy tómen bolady.
«Bul jumystar sýmen jabdyqtaý jelileriniń sapasy men beriktigin jaqsartý úshin qajet. Ýaqytsha qolaısyzdyqtarǵa túsinistikpen qarap, bir táýlikke jetetin aýyz sýdy toltyryp alýlaryńyzdy suraımyz», dedi «Astana sý arnasynyń» ókilderi.
