Bul týraly Nur-Sultan qalalyq sotynyń baspasóz qyzmeti málimdedi.
«2021 jylǵy 25 mamyrda Nur-Sultan qalasynyń Mamandandyrylǵan aýdanaralyq tergeý soty azamat M.-ny 2 aı merzimge, 2021 jylǵy 15 shildeni qosa alǵanda qamaýda ustaý túrindegi bultartpaý sharasyna sanksııa berdi.
Qazirgi tańda M. Grýzııa Respýblıkasynda jumysqa ornalastyramyn degen syltaýmen paıdalaný maqsatynda A-ǵa qatysty mámile jasady dep kúdiktelýde, bul abaısyzda onyń ólimine ákep soqqan (QK-niń 128-baby 4-bóliginiń 2-tarmaǵy)», delingen habarlamada.
Eske sala keteıik, qazaqstandyq Ásel Aıtpaeva 5 mamyrda Tbılısıde túsiniksiz jaǵdaıda qaıtys bolǵan edi. Boıjetken 8 qabattaǵy terezeden qulap ketken. Onyń ólimine qatysy bar degen kúdikpen Grýzııada er adam ustaldy. Qylmystyq kodekstiń eki baby boıynsha sotqa deıingi tergeý sharalary bastaldy. Kúdiktige zorlaý jáne adamnyń ar-namysyn kemsitý arqyly ózin ózi óltirýge deıin jetkizý sııaqty aıyptar taǵylyp otyr.
Sondaı-aq qaıǵyly oqıǵadan eki apta ótken soń Ásel Aıtpaevanyń alys týysy sanalatyn qazaqstandyq azamat M.-ǵa prokýratýra syrttaı aıyp taqty. Áseldi Grýzııaǵa jumys isteýge shaqyrǵan ol týysy Áseldi zorlap, artynan jergilikti kásipkerge satyp jibergen degen kúdikke ilinip otyr. Aýyr qylmys jasady degen kúdikpen M. ustalyp, ýaqytsha ustaý ızolıatoryna qamalǵan bolatyn.
