Keshe Vs. Ivanov, 49/1 kópqabatty úıiniń turǵyndary jınalys uıymdastyryp, múlik ıelenýshileri birlestigin (MIB) ashý máselesin talqylady.
– PIK jumysy máz bolmaı tur, jylý durys bolmaı, kómek surap habarlasqanda da kelmeıdi. MIB-qa aýyssaq jaqsylyq bolatyn shyǵar dep oılaımyz, – deıdi Vs. Ivanov, 49/1 úıiniń turǵyny Talǵat Shaıhımov.
Qalalyq turǵyn ınspeksııasy bólimi basshysynyń orynbasary Nurlan Rashıtovtiń aıtýynsha, qazirgi kezde shaharda MIB-qa aýysqan úılerdiń sany jetige jetti. Jyl sońyna deıin 2264 úı qaıtse de MIB nemese qarapaıym seriktestik (QS) deıtin eki formanyń birin tańdaýy tıis.
– 2022 jyl búkil qazaqstannyń úıleri MIB nemese QS ashý kerek. Kúndelikti negizde túsindirý jumystaryn ótkizip jatyrmyz. Mamyrdyń sońyna deıin taǵy tórt úı qosylady. Aqyryndap is alǵa basa bastady, – dedi Nurlan Rashıtov.
Turǵyn ınspeksııasy bólimi basshysynyń orynbasary barlyq úılerdi qamtý úshin aı saıyn ondap, tipti júzdep MIB-qa aýystyrý kerektigin aıtty.
Aıta keteıik, 2021 jylǵa qaraı barlyq qazaqstandyq kópqabatty úıler PIK-terden bas tartyp, árbireýi menshik ıeleri birlestiginiń (MIB) nemese qarapaıym seriktestik QS qurýy tıis bolatyn. Alaıda ártúrli sebepterge baılanysty bul prosess turalap, turǵyn úı reformasynyń aıaqtalý merzimi 2022 jyldyń jazyna deıin shegerildi.
Reforma «Bir úı – bir birlestik – bir esep-shot» qaǵıdasynyń júzege asyrylýyna jol ashady.
