Onyń aıtýynsha, polısııa táýekel toptaǵy kámeletke tolmaǵandarmen jeke jumys júrgizýde. Ondaı 5 myńnan astam adam jáne 7 myń qolaısyz otbasy esepte tur.
«Jyl basynan beri 2 myńnan astam ata-ana balalaryn tárbıeleýden jaltarǵany úshin ákimshilik jaýapkershilikke tartyldy, polısııanyń ótinishi boıynsha taǵy 300-ge jýyǵy sot sheshimimen ata-ana quqyǵynan aıyryldy. Aıta keteıin, jasóspirimderdiń túngi ýaqytta zańdy ókilderinsiz turǵynjaıdan tys júrgeni nemese oıyn-saýyq oryndarynda bolǵany úshin ákimshilik jaýapkershilik belgilengen. Mundaı buzýshylyqtar úshin mekeme ıeleri men kámeletke tolmaǵandardyń ata-analary jazalanady», dedi IIM ókili.
Baptar boıynsha ata–analarǵa eskertý jasaý, kásipkerlik sýbektilerge 9 myń teńge mólsherinde aıyppul salý qarastyrylǵan. Quqyq buzýshylyq qaıtalanǵan jaǵdaıda aıyppul 21 myń teńgege deıin artady.
«Sonymen qatar 1,5 myńǵa jýyq jasóspirim kámeletke tolmaǵandardy beıimdeý ortalyqtaryna ornalastyryldy. Polısııa jasóspirimderge alkogol men temeki ónimderin zańsyz satý faktilerin anyqtaý baǵytynda jumystar júrgizýde», dep tolyqtyrdy polkovnık.
