Otyrysta «Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy polıar mańyndaǵy orbıtalarǵa soltústik baǵytta ǵarysh apparattaryn ushyrý úshin «Baıqońyr» ǵarysh aılaǵynan «Soıýz-2» tıpindegi tasymaldaǵysh zymyrandardy ushyrýdy júzege asyrý jónindegi yntymaqtastyq týraly kelisimdi ratıfıkasııalaý týraly» jáne «1994 jylǵy 10 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy «Baıqońyr» keshenin jalǵa berý shartyna ózgeris engizý týraly hattamany ratıfıkasııalaý týraly» zań jobalary talqyǵa salyndy.
Qujattar «Soıýz-2» zymyran-tasyǵyshtaryn ushyrý kezinde qaýipsizdikti qamtamasyz etý úshin taraptardyń mindetterin naqty aıqyndaýǵa múmkindik beredi.
«Qujattarda halyq pen aýmaqtardyń ekologııalyq qaýipsizdigin qamtamasyz etý jónindegi taraptardyń mindettemeleri, sondaı-aq basqa da birqatar másele jazylǵan. Qujattardy ratıfıkasııalaý ǵarysh aılaǵyn kommersııalyq ushyrýlarmen júkteýdi ulǵaıtýǵa múmkindik beredi, bul búkil Baıqońyr kesheniniń tynys-tirshiligine oń áserin tıgizedi», dedi Talǵat Musabaev.
Zań jobalary sonymen qatar burynǵy mindettemelerdi úılestirýge, sondaı-aq «Baıqońyr» kesheniniń ǵylymı-tehnıkalyq, óndiristik jáne áleýmettik-mádenı áleýeti men ınfraqurylymyn saqtaýǵa, tıimdi paıdalanýǵa jáne damytýǵa múmkindik beredi.
