Densaýlyq saqtaý mınıstri Alekseı Soı Májilis otyrysynda medısınalyq qyzmetterdiń qoljetimdiligi men sapasyn jaqsartý úshin bólingen qarajattyń qanshalyq tıimdi paıdalanylǵanyna qatysty depýtattyń suraǵyna jaýap berip, halyqtyń 53,3 paıyzynyń medısınalyq kómektiń sapasyna áli de kóńili tolmaıtyny týraly statıstıkaǵa pikir bildirdi.
«Kóńil tolmaý jaǵdaıyna keler bolsaq, bul táýelsiz saraptamalyq uıymdardyń obektıvti baǵasy. Jalpy, densaýlyq saqtaý júıesine qanaǵattaný deńgeıi damyǵan elderde, tipti Eýropada da 65-70 paıyzdan aspaıdy», dedi Soı.
Mınıstriniń bul jaýabyna Májilis spıkeri Nurlan Nyǵmatýlın de pikir bildirip, mınıstrdi halyqqa jaqyn bolýǵa shaqyrdy.
«Qazir Densaýlyq saqtaý mınıstrligine ońaı emes ekenin túsinemiz. Biraq halyqpen baılanys ornatatyn ýaqyt keldi. Jýrnalıster qoıǵan suraqtardyń jartysyna da jaýap bermeısiz. Kim úshin jumys istep júrsiz? Baryp, adamdarmen sóılesińiz! Ol adamdar bizdi saılaıdy, al Parlament sizdi taǵaıyndady. El basshylyǵy, Parlament sizdi qoldady. Sizge qarajat bólindi. Jumys isteıtin ýaqyt keldi», dedi ol.
Eske sala keteıik, Májilis spıkeri buǵan deıin de Densaýlyq saqtaý mınıstriniń jumysyn synǵa alǵan edi.
