Eń aldymen memlekettik mekemeler qoǵamdyq uıymdarmen tyǵyz baılanysta bolýy kerek, ekeýiniń tıimdi jumysyn arttyrý – mindet. Bul rette Úkimet arnaıy jospar daıyndaıdy dep oılaımyn. Azamattyq qoǵamnyń ókili retinde seriktestikke daıynmyn.
Meniń qoldaýymnyń sebebi – ózim basqaryp otyrǵan uıym turmystyq zorlyq-zombylyqqa qatysty jobany qolǵa alyp otyr. Elimizde bul ózekti másele ekeni, túıini tabylmaı turǵany anyq. Bul – elimiz úshin úlken syn. Tulǵaǵa qol tıgizbeý boıynsha zańnama jıi buzylyp otyr. Oǵan qosa balalarǵa arnalǵan ınternattar men qarttar úıindegi, túrmelerdegi zorlyq-zombylyq týraly ashyq aıtylmaıdy. Máselen, byltyr Aıagózdegi bolǵan oqıǵa osyǵan dálel. 4 kishkentaı bala basynan jaraqat alyp, qaıtys boldy. Olardy urǵany anyq qoı. Mundaı qorqynyshty jaǵdaı týraly ashyq aıtý kerek.
«Aman-saýlyq» qoǵamdyq qory zorlyqqa qarsy uıymdar koalısııasyna kiredi. Uıym júrgizen taldaý nátıjesinde zábir kórgender quqyq qorǵaý organdaryna emes, eń aldymen medısınalyq ortalyqtarǵa barady. Jábirleýshiler de qysym kórsetedi, jaǵdaıdy aıtpaýy úshin qorqytyp, qoqan-loqy jasaıdy. Sondyqtan jábirlenýshilerdiń kóbi «quladym, abaısyzda boldy» degen syltaý aıtyp, jaltarady. Odan keıin jábir kórgenin dáleldeý qıyn. О́ıtkeni dáriger naýqastyń aıtýy boıynsha jazady. Al onda zorlyq-zombylyq faktisi týraly jazba bolmaıdy.
Bul másele boıynsha 2019 jyldan bastap jumys júrgizilip keledi. Máseleni sheshý úshin tek memlekettiń nemese úkimettik emes uıymdardyń jumys istegeni jetkiliksiz. Birlesip áreket etý kerek. Osy oraıda biz Qyrǵyz Respýblıkasyna issaparmen baryp, olardyń tájirıbesimen tanystyq.
Biz endi Nur-Sultan, Almaty, Qaraǵandy qalalarynda qanatqaqty jobany iske qosamyz. Keıin is júzinde jaǵdaıdyń retin kórip, bálkim, ózgeris engizýimiz de múmkin. Jyldyń aıaǵyna deıin jobany respýblıka boıynsha engizýdi maqsat etemiz. Bul jábirlenýshilerdiń quqyǵyn qorǵap, qysym kórsetýshiniń zań aldynda jaýap berýine yqpalyn tıgizedi.
Baqyt TÚMENOVA,
«Aman-saýlyq» qoǵamdyq qorynyń jetekshisi
