Áleýmettik jelilerde lezde taralyp ketken beınejazba Ten-l`Ermıtaj kommýnasynyń aldynda túsirilgen. Narazy azamat prezıdentke «Makronızm toqtatylsyn!» dep aıqaılap úlgergen.
Prezıdenttiń kúzet qyzmeti jedel áreket etip, Emmanýel Makrondy oqshaýlap úlgeredi. Fransııalyq basylymdar oqıǵaǵa qatysty eki azamattyń qamaýǵa alynǵanyn jazdy.
Fransııa kóshbasshysy oqıǵaǵa qatysty túsinikteme berdi. «Bul jaǵdaıdy tym ásireleýdiń qajeti joq. Bul oqıǵa bizdi alańdatyp, nazarymyzdy ózge de mańyzdy máselelerden burmaýy kerek», dep jaýap berdi.
Bul oqıǵadan keıin úkimet basshysy Jan Kasteks Ulttyq assambleıaǵa joldaý jasap, memlekette demokratııa men sóz bostandyǵyna ruqsat bolsa da, zorlaý, bopsalaý nemese basqa da kúsh kórsetýge jol berilmeýi kerektigin aıtty.
Solshyldardyń kóshbasshysy Jan-Lıýk Melanshon da bul pikirmen kelisetinin aıtyp, prezıdentke qoldaý bildirdi. Fransýz saıasatyndaǵy ońshyldardan shyqqan ákki saıasatker Marın le Pen de prezıdentke qol jumsaǵan azamatty synǵa aldy. Ol tipti qyzý talqyǵa ulasatyn demokratııalyq pikirtalas kezinde de qol jumsaýǵa jol berilmeıtinin aıtty.
Prezıdent ákimshiligi oqıǵanyń Drom aımaǵynda bolǵanyn, azamattyń memleket basshysyna qol kótergenin rastaýmen ǵana shekteldi. Odan keıingi aqparatpen bólisken joq. Tártip buzýshylardyń jaýapqa tartylǵany týraly da resmı habar taratylmady. Degenmen, birqatar fransııalyq agenttik eki azamattyń túrmege qamalýy múmkin ekenin jazdy.
