Qujatta Oral qalasynyń ákiminiń sheshimimen Oral qalasynda kúshti áser etetin ýly zat tabylýyna baılanysty jergilikti aýqymdaǵy tehnogendik sıpattaǵy tótenshe jaǵdaı jarııalanǵany, tótenshe jaǵdaıdyń saldaryn joıý tobynyń basshysy bolyp - Oral qalasy ákiminiń orynbasary M.Múlkáı taǵaıyndalǵany jóninde jazylǵan.
Qala ákimdiginiń baspasóz qyzmeti habarlaǵanyndaı, maýsymnyń 2-si kúni Jeltaý bıigindegi qalalyq zırat aýmaǵynan rezına konteınerge quıylǵan salmaǵy 1 kelideı belgisiz zat tabylǵan. Aldyn ala boljam boıynsha bul asa qaýipti suıyq metall – synap bolýy múmkin. Ony bul jerge kim ákelgeni belgisiz.
Osy oqıǵadan keıin qaýipti aımaqqa Tótenshe jaǵdaılar departamentiniń mamandary kelip, kúdikti nárse tabylǵan jerdi hımııalyq óńdeýden ótkizgen. Sanıtarlyq-epıdemıologııalyq qadaǵalaý oryndary oqıǵa ornynda synap býy mólsherin ólshep, aýa quramy qalypty jaǵdaıdan aýytqymaǵanyn anyqtaǵan. Iаǵnı adam men tabıǵatqa tóngen qaýip joq.
Kúdikti konteıner Batys Qazaqstan oblystyq Ekologııa departamentine ýaqytsha saqtaýǵa berildi, ony odan ári qaýipsiz joıý sharalary jasalyp jatyr eken.
Bul jóninde Oral qalasy ákiminiń keńesshisi A.Qadyrov pen Oral qalalyq Tótenshe jaǵdaılar basqarmasy bastyǵy A.Eshmuhanov jýrnalısterge túsinik berdi.
«Jergilikti aýqymdaǵy tehnogendik sıpattaǵy tótenshe jaǵdaıdy jarııalaý sheshimi «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» Zańy men «Azamattyq qorǵanys týraly» Zańǵa, Qazaqstan Respýblıkasy Úkimetiniń 2014 jylǵy 2 shildedegi №756 «Tabıǵı jáne tehnogendik sıpattaǵy tótenshe jaǵdaılardyń synyptamasyn belgileý týraly» qaýlysyna sáıkes shyǵarylyp otyr.
Mundaı qujat tabylǵan qaýipti zatty tasymaldaý jáne joıý sharalaryn uıymdastyrý úshin mindetti, standartty prosedýra» delingen Oral qalalyq ákimdigi taratqan aqparat paraǵynda.
