Elordalyq ulandar joǵalǵan balalardy ata-analaryna tabystady

13 maýsym kúni saǵat 16.00-de áskerı jasaq bastyǵy qatardaǵy Sergeı Nacharov bastaǵan quramynda patrýlshi qatardaǵy Ismaıl Botaev pen Damır Sykýnov bar ulandyqtar «Jetisý» saıabaǵynda qyzmet atqarý kezinde eresekterdiń qaraýynsyz qalǵan balany baıqaıdy.

Bul jaǵdaı týraly patrýldik top bastyǵy serjant Baýyrjan Jumabekovke baıandalady. Biraz ýaqyttan soń balanyń týystary tabylyp, 4 jasar uly anasyna qaıtarylady.

Belgili bolǵandaı, anasy balalaryn ákesine qaldyrǵan. Ákesi 3 jasar qaryndasyna alańdap otyrǵanda aǵasy saıabaqtyń ishine qaraı júgirip ketip, adasyp qalaǵan. Ata-analary óz betinshe izdegenmen nátıje bolmaǵan. Qýanyshqa oraı, der kezinde ornynan tabylǵan ulandyq áskerı jasaq qyraǵylyq tanytyp, balany jaqyndaryna tapsyrdy. О́z kezeginde olar áskerı qyzmetshilerge alǵystaryn aıtty.

Osy kúni saǵat 16.40-ta patrýldik top bastyǵy serjant Baýyrjan Jumabekov óziniń patrýlshileri qatardaǵy jaýyngerler Shynybaı Tilegen jáne Abylaı Ákimjanovpen áskerı jasaqtardy tekserý kezinde kózderi taǵy bir balany shalady. Ol da úlkenderdiń qaraýynsyz óz betimen qydyryp júrgen.

Araǵa ýaqyt salyp bala ájesine tabystaldy. Anyq bolǵandaı, uldyń anasy, ájesi jáne baýyrlary saıabaqta serýendep júrgen. Bir jasar qaryndasyn emizýge otyrǵanda 4 jasar aǵasy júgirip ketken. 20 mınýt izdeý júrgizgen ájesi balany ulandyq jasaqpen birge kórgende qýanyshyn jasyrmady.

Balanyń jaqyndary kórsetken qyraǵylyqtary úshin quqyqtyq tártip áskeriniń komandırleri men jaýyngerlerine zor alǵysyn bildirdi.