Elordalyq kásipkerler palatasy Nur-Sultan qalasynyń Investısııalar jáne kásipkerlikti damytý basqarmasymen birlesip, «Bıznestiń jol kartasy – 2025» baǵdarlama aıasyndaǵy baıqaý jóninde áleýmettik jelide tikeleı efır ótkizdi. Onda palata dırektorynyń orynbasary Beısen Jolboldıev jáne Nur-Sultan qalasy Investısııalar jáne kásipkerlikti damytý basqarmasynyń bas mamany Aıjan Nurmatova qajetti málimetterdi bólisip, baǵdarlama aıasyndaǵy jobalar týraly kásipkerlerge túsindirip berdi.
Aıjan Nurmatovanyń aıtýynsha, 2021 jyly ınnovasııalyq bıznes-jobalardy granttyq qarjylandyrýǵa 345 mln teńge bólingen. «Bıyl baıqaýǵa qatysýǵa ótinimder qoldau.kz portaly arqyly tek onlaın qabyldanady. Portalǵa jeke kásipkerlik nemese jaýapkershiligi shekteýli seriktestiktiń elektrondy sıfrly qoltańbasymen ǵana kirýge bolady. О́tinimmen qosa, kerekti qujattyń bári PDF formatynda tapsyrylýy kerek. Grant alýǵa Úkimettiń qaýlysymen bekitilgen ekonomıkanyń basym sektorlaryndaǵy shaǵyn bıznes ókilderi úmitker bola alady (ekonomıkanyń basym sektory tizbesin myna siltemeden kórýge bolady: https://adilet.zan.kz/rus/docs/P1900000968). Grant alýdyń basty sharty tyń bıznes-ıdeıa, ınnovasııalyq joba bolýy qajet jáne jańa jumys oryndaryn qurýǵa septigi tııýi kerek», dedi A.Nurmatova.
Baıqaýǵa qatysýǵa úmitkerlerdiń «Bastaý-Bıznes» nemese «Bıznes-mektep» kýrstarynan ótkenin rastaıtyn, merzimi eki jyldan aspaǵan sertıfıkaty, bıznes-jospary, memlekettik grant somasynyń 10 paıyzynan kem túspeıtin teń qarjylandyrý múmkindigi baryn rastaıtyn qujaty bolýy mindetti. Qalǵan qujattar tizim boıynsha anyqtalady.
«Áleýmettik osal topqa jatatyn úmitkerlerge jeke qarjylandyrý jáne bıznes-ıdeıanyń jańashyldyǵy jónindegi talaptar qoıylmaıdy», deıdi bas maman.
Kásipkerler utqan grant qarjysyn taýarǵa, qyzmet kórsetýge qajetti shıkizatty, materıaldardy satyp alýǵa nemese materıaldyq emes aktıvter men tehnologııalardy, keshendi kásipkerlik lısenzııaǵa quqyqtardy alýǵa (franchaızıng) jumsaı alady. Sondaı-aq zertteýlerge, jańa tehnologııalardy engizýge baılanysty shyǵyndardy óteýge arnasa da bolady.
«Grant qarajaty eki transhpen bólinedi. Birinshi transh tolyq ıgerilgennen keıin ekinshisi beriledi. Baıqaý ótkizý týraly jáne ótinim qabyldaýdyń naqty ýaqyty jóninde jekeleı habarlaımyz», deıdi A.Nurmatova.
Nur-Sultan qalalyq kásipkerler palatasy bergen málimet boıynsha, byltyr jalpy somasy 250 mln teńgeni quraıtyn 5 mln teńgege deıingi grantty 57 kásipker alǵan eken.
