Qoǵamdyq kólik kóńilden shyqpaı tur

Qala basshylyǵy byltyrdan beri ekopark qurylysyn da júrgizýde. «Qarasaı batyr» stadıonynyń mańynda ornalasqan bul oryn – bala­lyq dáýrenniń qyzyq ordasy. «Jastar» stadıonynyń fýtbol maneji de bıyl jóndeýden ótip, sport­súıgish balalardyń súıikti ornyna aınalǵan.

Qala ákimi Bolat Jumabekov óziniń jýyrdaǵy áleýmettik-ekonomıkalyq damý jónindegi baıandamasynda tur­ǵyn úılerdiń aýlasyna jasalǵan burynǵy 6 trenajerdiń ornyna bıyl taǵy 20-sy qosylatynyn aıtyp, balalardy qýantyp qoıdy. Jazǵy kanıkýlda 15 sport alańynda shaǵyn fýtboldan balalar arasynda jarys ótkizilmek. Oǵan kem degende 2 myńnan artyq bala qatysady dep josparlanǵan.

Qyzyljardyń osyndaı kórki­ne qala ishinde júretin eski avtobýs­tardyń jutańqy túrleri jaraspaıdy-aq. Qazir qalanyń ishinde 20 avtobýs marshrýty bar. Kún saıyn qala kóshelerine 197 avtobýs pen shaǵyn avtobýs shyǵady. Marshrýttarǵa 11 tasymaldaýshy kompanııa qyzmet kórsetedi. 2020 jyly qalaǵa birde-bir jańa avtobýs alynbaǵan. Onyń obektıvti sebepteri bar. Sonyń ishin­de jaman indettiń kesiri kóp bolǵany belgili. Al bıyl 100 jańa avtobýs alynatyny jóninde áńgime kópten beri aıtylyp keledi, biraq solar áli de jetpeı jatyr. Ákim baıandamasynda bul kólikterdiń shilde men tamyz aılarynda kelip qalatynyn aıtty. Al qazirgi avtobýstardyń kóbi qalanyń kórkin qashyryp tur. Onyń keı­birinen qoıý qara tútin býdaqtap, qalanyń ekologııasyn da búldirip júr.

Jýyrda oblys polıseıleri «Qoǵamdyq kóliktegi ekologııalyq qaýip­sizdik» ataýly reıdin júrgizip, arnaıy qurylǵylarmen avtobýstan shyǵatyn tútinniń aýany lastaý deń­geıin anyqtady. Tútindegi zııandy gaz mólsheri tekserilgen 6 avtobýstyń beseýinde shamadan tys kóp boldy. Bireýinde onyń mólsheri normadan 5 ese artyq bolsa, taǵy birinde 16 ese kóp bolǵan.

«Bul júrgizýshiler Ákimshilik quqyq buzý­shylyq kodeksiniń «shyǵaryn­­dylarda lastaýshy zat­tar­­dyń bolýy normatıvterden asyp ketetin avtomotokólikterdi jáne basqa da jyljymaly quraldardy paı­dalaný» jónindegi 334-babymen jaýapkershilikke tartyldy. Aýany lastaıtyn zattardyń kólemi 2 ese kóp bolsa eskertý, al kóbirek bol­sa 2 aılyq eseptik kórsetkish kóleminde aıyppul salynady», deıdi PD Jergilikti polısııa qyzmeti bas­qarmasy bastyǵynyń mindetin atqarýshy, polısııa pod­polkovnıgi Grıgorıı Tysh.

Sonymen birge kólik quraldary­nyń tehnıkalyq jaǵdaıy da tek­serilgen. Sóıtse reıs aldyndaǵy baı­qaýdan 4 júrgizýshi ótpegen bolyp shyqty. Bul jol qaýipsizdigin saqtaý tártibin óreskel buzýshylyq bolyp esepteledi. Júrgizýshiniń qan qysymy tekserilmegen bolsa, alkogoldi ishimdik paıdalanbaǵany anyqtalmasa, oǵan senim de joq. Demek, tasymaldaýmen aınalysatyn kompanııalar ózderiniń mindetin tolyq oryndamaıdy.

Ákimdik qalanyń ishindegi №2, №14 jáne №24 marshrýttarǵa qyzmet kórsetetin osyndaı tasymaldaýshylarmen kelisimsharttardy buzyp, bas­qa tasymaldaýshy taǵaıyndaý týraly sheshim qabyldap otyr. Endi óz isine jaýapty kompanııalar kelip, shahar ishindegi avtobýs tasymaly jaqsarar degen úmit bar. Bul, ásirese jeke kóligi joq qart adamdar men áleýmettik áljýaz topqa jatatyn jandar úshin mańyzdy. Olar kólik úshin tek avtobýsty paıdalanady. Qazir qala ákimdiginiń qoldaýymen osyndaı 9,5 myń adam qalaishilik avtobýstarmen tegin jáne jartylaı tegin baǵamen júredi.

PETROPAVL