«Jasyl ekonomıkany» damytý jáne jańartylatyn energııa kózderine sheteldik ınvestısııalardy tartý perspektıvalary týraly 26-shy klımattyq sammıttiń óńirlik elshisi Devıd Morgan, Amerıkalyq saýda palatasynyń QR-daǵy atqarýshy dırektory Dorıs Bredbıýrı, Qazaqstanda akkredıttelgen AQSh elshisi Ýılıam Mozer, Nıderlandy elshisi Andre Karstens, Kanada elshisi Nıkolıa Brýsso, Halyqaralyq energetıka agenttigi bas dırektorynyń orynbasary Merı Ýorlık, QR-daǵy EQDB ókildiginiń dırektory Agrıs Preımanıs, sondaı-aq GE, Chevron, Morgan Lewis jáne t. b. kompanııalardyń ókilderi baıandama jasady.
Qabyldanǵan sharalar týraly ekologııa, geologııa jáne tabıǵı resýrstar mınıstri Maǵzum Myrzaǵalıev pen energetıka birinshi vıse-mınıstri Murat Júrebekov aqparat berdi. Qazaqstan ekonomıkasyn dekarbonızasııalaý jáne energııa tıimdiligin arttyrý máseleleri, Parıj kelisimi boıynsha mindettemelerdi oryndaý tetikteri, klımattyń ózgerýine beıimdelý sharalary, sondaı-aq jańartylatyn energııa kózderi salasyndaǵy ınvestısııalyq jobalardy iske asyrýdyń praktıkalyq aspektileri talqylandy.
«2020 jylǵy jeltoqsanda BUU aıasynda uıymdastyrylǵan Klımattyq ambısııalar jónindegi sammıtte QR Prezıdenti Qasym-Jomart Toqaev Qazaqstannyń 2060 jylǵa qaraı kómirtekti beıtaraptyqqa qol jetkizý maqsaty týraly jarııalady. Biz energııa óndirisiniń jalpy kóleminde jańartylatyn energııa kózderiniń úlesin arttyrý boıynsha barynsha kúsh-jiger jumsaımyz. Máselen, 2020 jylǵy jaǵdaı boıynsha bul kórsetkish 3%-dy qurady, 2022 jyly ony 6%-ǵa deıin eki esege arttyrý josparlanýda. 2030 jylǵa qaraı Qazaqstannyń energetıkasyndaǵy jasyl energııanyń úlesi 15%-ǵa deıin jetkiziledi», dedi A. Mamın.
Úkimet basshysy 2020 jyly QR-nyń «jasyl ekonomıkaǵa» kóshýi jónindegi tujyrymdamany iske asyrýdyń 2021-2030 jyldarǵa arnalǵan jańartylǵan is-sharalar jospary qabyldanǵanyn atap ótti. Jospar EO seriktesterimen tyǵyz yntymaqtastyq ornata otyryp ázirlendi, onda el aldynda turǵan asa eleýli ekologııalyq syn-tegeýrinderdi joıý jónindegi sharalar qarastyrylǵan. Josparlanǵan is-sharalardy oryndaý álemniń asa damyǵan 30 ekonomıkasynyń tizimine kirý jónindegi maqsatqa qol jetkizgen kezde Qazaqstannyń «jasyl» ósim boıynsha uzaq merzimdi mindettemeleriniń saqtalýyn qamtamasyz etýge múmkindik beredi. Premer-Mınıstr Qazaqstannyń balamaly energetıkany damytý úshin ınvestısııalyq ortany jaqsartý jóninde sharalar qabyldaǵanyn atap ótti.
«Biz jańartylatyn energııa kózderin óndirýshilerdi qoldaý jáne naryqtyń ınvestısııalyq tartymdylyǵyn jaqsartý boıynsha birqatar keshendi shara qabyldadyq. Máselen, suranys qurylymyn óndirýshiler úshin barynsha boljamdy ári eleýli etý úshin jańartylatyn energııa kózderi boıynsha aýksıondar engizildi. Sonyń nátıjesinde sońǵy 6 jylda JEK-tiń belgilengen qýaty shamamen 10 esege – 2014 jylǵy 180 MVt-tan 2020 jyly 1650 MVt-qa deıin ulǵaıdy», dedi A. Mamın.
Turaqty damý mindetterin iske asyrý maqsatynda Qazaqstanda jańa Ekologııalyq kodeks qabyldandy, ol QR-da jańartylatyn energııa kózderiniń ozyq tehnologııalaryn jedel engizýge yqpal etetin bolady. Qazaqstannyń 50 iri kásiporny óziniń óndiristik prosesinde eń ozyq qoljetimdi tehnologııalardy paıdalanýdy keńeıtýge mindetti bolady.
