Jańa múmkindikterge jol ashatyn jobalar

Atalǵan forýmǵa qatysý­shylar áýeli «Kóne Taraz» keshe­niniń kórme zalynda boldy. Mun­da túrli baǵdarlamalar men jo­ba­larǵa qatysyp, jeke kásibin ash­qan kəsipkerlerdiń óndirgen ónimi men qolynan shyqqan dú­nıeleri qoıylǵan. Sondaı-aq forýmnyń ashylýy aldynda oblys ákimi Berdibek Saparbaev óńirde áleý­mettik kásipkerlikti damytýǵa úles qosyp otyrǵan kópbalaly analar men múmkindigi shekteýli azamattardyń kór­mege qoıylǵan kondıterlik, sút ónim­deri jáne qolóner men jıhaz, aıaq kıim, qýyrshaqtar men qyz jasaýlary buıym­darymen tanysty. Máselen, memleket tarapynan qaıtarymsyz 2 mln teńge utyp alǵan Merki aýdanyndaǵy jeke kəsip­ker Ushan О́mirzaqova kondıterlik seh ashyp, jumysyn jolǵa qoıypty. Al Shý aýdanynan jeke kəsipker ári kópbalaly ana Saıra Tileýhanova «Eńbek» memlekettik baǵdarlamasy aıasynda alǵan 5 mln teńge nesıesine sút óńdeıtin seh ashypty. Ol búginde pasterlengen sút, aıran, sary maı, qurt pen irimshik jáne taǵy basqa da sút ónimderin óndirýde. Sonymen qatar óner­tapqysh, ekinshi toptaǵy múm­kindigi shekteýli azamat Raýan Raýyl­bekovtiń óz betinshe júrip-turý múmkindiginen aıyrylǵan azamattarǵa arnalǵan «Metron» mehanıkalyq qozǵaltqyshy qo­naqtardyń qyzyǵýshylyǵyn týdyrdy. Raýan bul quraldy jasap shyǵý úshin 3 mln teńge nesıe alypty. Qazir onyń tirek-qımyl júıesi buzylǵan azamattarǵa arnap jasap jatqan mundaı apparaty 200 myń teńgeden ótkizilýde. Qazirgi kezde 4 adamdy jumyspen qam­typ, budan bólek tapsyrys­pen bas­qa da buıymdar jasap keledi. Budan bólek túrli jı­hazdar men kádesyılar, qýyr­shaq­tar, bylǵary aıaq kıimder men qyz jasaýyn tigip, ony kásip kózi­­ne aı­nal­dyrǵan áleýmettik top­taǵy kásip­kerlerdiń báriniń jumy­symen jeke tany­syp shyq­qan oblys ákimi olardyń árqaı­sysynyń bastaǵan jumysy­na sát­ti­lik tiledi.

Halyqaralyq forýmdy oblys əkimi B.Saparbaev ashyp ber­di. «Búgingi forýmǵa Reseıden, Túrkııadan, TMD elderinen qo­naqtar kelip, qatysyp otyr. Bul forýmdy ótkizýdegi bas­ty maq­satymyz – óńirimizdegi áleý­met­tik kəsipkerlikti damytý. Mem­leket tarapynan múmkindigi shekteýli azamat­tardyń óz kəsi­bin ashyp, qoǵamǵa tar­tylýyna járdemdesý. Olardyń məse­lesin forýmda talqylap, shetel­dik árip­testerimizdiń tá­jirı­besine súıene otyryp bir­lese sheshýge tyrysamyz. Sóı­­tip ózge memleketterdiń ozyq təji­rbıelerin óńirimizde qol­­danýǵa jol ashatyn bolamyz. Qazirgi tańda əleýmettik kəsipkerlikti damytý boıynsha jańa zań – Parlamenttiń qara­ýyn­da. Bul zań qabyldansa, əleýmettik kəsipkerliktiń már­tebesi anyqtalyp, salyqta túrli jeńildikter qaralyp, basqa da múmkindikter jasalady degen senimdemin», dedi B.Saparbaev. Sondaı-aq oblys əkimi osy sa­nattaǵy azamattardyń búgingi tańda 500 myńnan 5 mln teńgege deıin qaıtarymsyz grant jáne nesıe alyp, óz kəsibin ashyp jat­qandardyń kóp ekenin aıtty. Budan bólek «Asarlatyp úı salý» jáne «Jomart júrek» jo­balary aıasynda at­qarylyp jatqan jumystarǵa da toqtaldy.

Al elimizdiń Eńbek jəne ha­lyqty əleýmettik qorǵaý mınıstri Serik Shapkenov Taraz tórinde ótken halyqa­ralyq fo­rýmǵa onlaın rejimi arqyly qa­tysyp, onyń mańyzdylyǵyn atap ótti. «Aldymen búgin shetel­dik əriptes­terimizben forým aıa­synda təjirıbe almasýǵa bar múmkindikti jasap otyrǵan Jam­byl oblysynyń əkimdigine rahmet aıtqym keledi. Bul forýmnyń bas­ty maqsaty – áleýmettik top­qa jatatyn jáne múmkindigi shekteýli azamattardyń məselesin sheshý. Olardy qoǵamdyq ortaǵa, kəsipke bet burýǵa tarta otyryp, qoǵamnan ne alamyn dep emes, qoǵamǵa men ne bere alamyn degen qaǵı­damen olardyń ómirge degen qul­shynysyn arttyrý. Osy forýmnan keıin bizdiń ortamyzda ózin kórsete almaı otyrǵan múmkindigi shekteýli azamattar əleýmettik kəsipkerlikti damytý jobasy aıasynda ózin kórsetýge, kəsibin ashýǵa múmkindik alady degen senimdemin. Olar forýmǵa qatysý arqyly kəsipkerlerge qandaı qoldaý kórsetiletinin biletin bolady. Sheteldik mamandardyń tájirıbesine súıene otyryp jumysyn jolǵa qoıady degen senimdemin», dedi mınıstr.

Odan ári atalǵan halyqaralyq forýmdy áleýmettik kásipker-moderator Emın Áskerov júr­gizip otyrdy. Sondaı-aq jıynda Eýropalyq qaıta qurý jáne da­mý banki Shaǵyn jáne orta bıznesti qarjylandyrý jáne damytý tobynyń joba mamany Murat Narqulov, «Jambyl oblysynyń kommersııalyq emes uıymdarynyń qaýymdastyǵy» zańdy tulǵalar birlestiginiń tóraǵasy Aınur Zaýrbekova atqa­ryp jatqan jumystary týraly áńgimeledi. Al AQSh-tyń Qazaqstandaǵy Bas konsýl­dy­ǵynyń mádenı keńesshisi Anand Krıshna áleýmettik kásipkerlikti elimizdiń Nur-Sultan, Almaty jáne Taldyqorǵan qalalarynda damytý úshin ondaǵy kásipker­lerge qandaı kómek kórsetip jatqanyn aıtyp ótti. Sonymen qatar bangladeshtik ekonomıka ǵylymdarynyń professory, áleý­­mettik kásipkerlik sala­syn­daǵy Nobel syılyǵy­nyń laý­rea­ty Mohamed Iýnýs, áleýmettik ınvestısııalar jáne kásip­kerlik salasyndaǵy jetek­shi reseı­lik sarapshy Sergeı Golýbev jáne Qyr­ǵyz eliniń «Áleýmettik kásip­kerler qaýym­dastyǵynyń» basqarma tóraǵasy Baqyt­bek Saǵynaly bul saladaǵy óz tájirı­belerimen bólisti. Al Tájik­standaǵy áıelder kásipkerligi kúniniń elshisi Nasıbahon Amı­nova Jambyl óńiri men Dýshanbe arasyndaǵy týrızmdi damytý týraly oıyn ortaǵa saldy. Bul usynysty B.Saparbaev ta qoldap, Taraz ben Dýshanbe arasynda ashylǵaly otyrǵan áýe reısi eki qala arasyndaǵy, sonyń ishindegi 2 myń jyldan as­tam tarıhy bar Taraz týrızmin tany­týǵa óz yqpalyn tıgizetinine se­nim­di ekenin jetkizdi. Budan keıin forým jumysy túrli seksııa­lar bo­ıyn­sha jalǵasty.

Jambyl oblysy