Sońǵy eki ujymnyń pleı-off básekesindegi matchy jankúıerler tarapynan úlken qyzyǵýshylyq týdyrǵan edi. О́ıtkeni biri quramalar arasynda FIFA reıtınginde kósh bastap tursa, ekinshisi Eýropanyń ázirshe eń sońǵy chempıony sanalady. Sondyqtan eki quramanyń da bıylǵy maqsaty joǵarydaǵy ataqtaryna saı óz myqtylyǵyn dáleldeý bolatyn.
Portýgalııa toptyq kezeńde erekshe oıynymen jankúıerlerdiń kóńilinen shyqty dep aıta almaımyz. Ronaldý bastaǵan ujym Majarstandy qıynshylyqpen jeńip, toptan birinshi orynmen shyǵýdy kózdegen fransýzdarmen teń oınap, nemisterden ońbaı jeńilip, toptyq kezeńdi úshinshi orynmen aıaqtady. Portýgalııa osydan bes jyl buryn chempıon bolǵan kezde de toptyq kezeńdegi úsh matchta teń oınap, úshinshi orynmen kelesi kezeńge shyqqan bolatyn. Bıyl bul sáıkestik Portýgalııaǵa sáttilik ákele almady.
Deı turǵanmen, belgııalyqtar da toptyq kezeńde myqty oınady dep aıtý qıyn. Biraq Roberto Martınes shákirtteri úsh oıynda toǵyz upaı jınap, 100 paıyzdyq kórsetkishpen kelesi kezeńge joldama aldy. Eger baıqaǵan bolsańyzdar, Belgııa ár oıynda bar kúshin jumsap oınamaıdy. Keshegi Portýgalııaǵa qarsy ótken oıynda da olar áli bar kúshimen jumsaýǵa asyqpaıtynyn kórsetti.
Match basynda Portýgalııa qarsylasty qarsy shabýylda qapy qaldyrýdy kózdegenimen, Dıogý Jota óz múmkindikterin tıimdi paıdalana almady. Keıinnen belgııalyqtar pozısııalyq shabýylǵa kóship, jankúıerlerdi biraz zeriktirip alsa da, match sońynda jeńiske jetti. Birinshi taımnyń 42-mınýtynda Torgan Azardyń alystan tepken doby qaqpashyǵa yńǵaısyzdyq týdyryp, dop qaqpa tórinen tabyldy.
Portýgalııa quramasy match boıy Belgııa qaqpasyna 23 márte dál soqqy jasaǵanymen, onyń birde-bireýi qaqpa torynan tabylmady. Al match boıy bir ǵana dál soqqy jasaǵan Martınes shákirtteri kelesi kezeńge shyqty. Ronaldýdy rekordsyz qaldyrǵan Belgııa endi shırek fınalda Aýstrııany áreń jeńgen Italııa quramasymen jolyǵady.
Toptyq kezeńde jınaqy oıyn kórsetip, múmkin bolǵan toǵyz upaıdyń bárin shashpaı-tókpeı jınap alǵan Nıderland quramasyn fýtbol mamandary chempıondyqtan úmitker komandalardyń qataryna qosqan edi. Al toptyq kezeńde 4 upaımen úshinshi oryn alyp, qosymsha joldamamen kelesi kezeńge shyqqan Chehııa quramasy Eýrodaǵy joryǵyn pleı-off kezeńinde aıaqtaıdy degender kóp bolǵan-dy. Mamandardyń senimsizdigine ıe bolǵan sol Chehııa barlyq boljamnyń kúl-talqanyn shyǵaryp, Eýroda kishigirim sensasııa jasady.
Chehııany chempıonat boıy órge súırep kele jatqan Patrık Shık bul joly da quramasyn shırek fınalǵa alyp shyqty. Birinshi taımda quramalardyń kúshi teń bolyp, úziliske de 0:0 esebimen tarqasty. Ekinshi taımdy da eki ujym tap-tamasha bastaǵan bolatyn. Alaıda oıynnyń 55-mınýtyndaǵy jaǵdaı kezdesý sýretin 180 gradýsqa ózgertip jiberdi. Matchty basqarǵan reseılik tóreshi Sergeı Karasev oıyn tártibin buzǵan Nıderland quramasynyń qorǵaýshysy Matteıs de Lıgtke alǵash sary qaǵaz kórsetkenimen, keıinnen VAR júıesinde otyrǵan vıdeoassıstentiniń keńesinen soń beıneqaıtalaýdy kórip, qaǵaz túsin qyzylǵa ózgertti. Bul – osy chempıonattaǵy tórtinshi qyzyl qaǵaz. Buǵan deıin Gjegosh Kryhovıak (Polsha), Garrı Ýılson (Ýels) jáne Itan Ampadý (Ýels) sekildi fýtbolshylar alańnan qýylǵan edi.
Alańda bir oıynshy kem bolǵanyna qaramastan, Nıderland fýtbolshylary 10 mınýttan asa ýaqyt shabýylda da, qorǵanysta da táýir oınap jatqan edi. Biraq báribir oıynda bir adam kóp bolyp oınaǵan Chehııa quramasy 68-mınýtta esepti ashty. Gol avtory – Tomash Holesh. Arada kóp ótpeı shabýylda tynyp-tynshymaıtyn Patrık Shık chempıonattaǵy tórtinshi golyn soǵyp, oıynnyń núktesin qoıdy. Qorytyndy esep – 0:2.
Chehııa jartylaı fınalǵa shyǵý úshin shırek fınalda Ýels quramasyn jarys jolynan shyǵaryp jibergen Danııa fýtbolshylarymen kezdesedi.
