О́z zamanynda qasıetti qobyzben qazaq dalasyn qońyr sazǵa bólegen Yqylas babamyz qobyzshylar áýletinde ómirge kelgen, onyń ákesi Dúken de, atasy Altynbek te ataqty qobyzshy bolǵan. Sonyń da áseri bolar, ol jasynan ónerge jaqyn bolyp ósip, esimi erte tanylady. Jalpy, ataqty kúıshiniń shyǵarmalarynda ózi ómir súrgen dáýir men el arasyna keń taraǵan ańyz-áńgimeler aıshyqty jarasym tapqan.
Sonymen kıeli qobyz úni saltanat qurǵan keshte halyqaralyq baıqaýlardyń laýreaty, Yqylas babamyzdyń tikeleı urpaǵy Aqnar Sháripbaeva, Oljas Qurmanbek, halyqaralyq Shabyt festıvaliniń Gran-prı ıegeri Sholpan Sharapatova, Janar Júsipova, Toǵjan Ǵaısa, Eregúl Batqan sekildi talantty qobyzshylar kúıshiniń «Jolaýshynyń qońyr kúıi», «Toǵyz taraý», «Aıraýyqtyń ashy kúıi», «Jezkıik», «Erden» jáne t.b. týyndylaryn oryndap, tyńdarmandaryn kúı sazymen tolqytty.
Ásirese, daryndy qobyzshy, Qazaqstannyń eńbek sińirgen ártisi Raýshan Orazbaeva jetekshilik etetin «Qobyz-Rýh» ansambliniń oryndaýyndaǵy «Aqqý» kúıi kórermenniń qııalyn kókke samǵatyp, ǵajaıyp kúıge bóledi desek, artyq aıtqanymyz emes. Sondaı-aq keremet kesh shymyldyǵy «Qorqyt» etnoansambliniń kórkemdik jetekshisi, Mádenıet qaıratkeri Sholpan Qorǵanbektiń «Amanat» kúıimen jabyldy. Bul kúı atalǵan óner ujymynyń «tól qujaty» sekildi. О́ıtkeni ulttyq mýzyka aspaptarymen oryndaýyndaǵy osy kúıdi tyńdaǵanda qulaǵyńyzǵa uly dala saryny kelip, rýhtanyp ketesiz.
