Qazaqstannyń Ulybrıtanııadaǵy Elshiligi Qazaqstan Respýblıkasynyń Ulttyq akademııalyq kitaphanasymen (UAK) jáne «Ulttyq aýdarma bıýrosy» Koǵamdyq qorymen (UAB) birlesip, 21 maýsym men 1 shilde aralyǵynda London kitap jármeńkesine qatysty.
Atalǵan jármeńke – baspa, aýdıo, kıno, teleónimderdi jáne sandyq formattaǵy mazmundy satýǵa jáne taratýǵa, sondaı-aq olardyń baspa quqyqtaryn talqylaýǵa arnalǵan jahandyq alań. Jyl saıyn onda álemniń túkpir-túkpirinen 25 myńnan astam baspa isi mamandary jınalady.
Qazaqstan jármeńkede Shoqan Ýálıhanovtyń tańdamaly shyǵarmalary, Zamanaýı qazaq ádebıetiniń antologııalary, sondaı-aq Abaı Qunanbaıulynyń shyǵarmalar jınaǵyn kópshilik nazaryna usyndy. Atalmysh aǵylshyntildi basylymdar 2019 jáne 2020 jyldary Kembrıdj ýnıversıtetiniń baspasymen seriktestikte basylǵan.
Sonymen qatar stendte UAK jańa elektrondy kitaphanasynyń kitaptary jáne UAB Oksford ýnıversıteti baspasymen áriptestikte jarııalaǵan Oksford ekonomıkalyq jáne áleýmettik sózdikteri usynyldy.
UAB jármeńkede 500 myń sózden turatyn aǵylshyn-qazaq jáne qazaq-aǵylshyn tilderindegi Oksford qazaq sózdiginiń jobasyn usyndy. Jospar boıynsha, sózdik 2021 jyldyń sońyna deıin basylyp shyǵýy tıis.
