Iske qosylatyn ındeks segiz qazaqstandyq kompanııanyń AIX-te, Qazaqstan qor bırjasynda jáne London qor bırjasynda saýdalanatyn aksııalar men jahandyq depozıttik qolhattardan turady. Bul kompanııalardyń qataryna Qazaqstanda tirkelgen kompanııalar men qyzmetten túsken kirisi ishinara nemese tolyq Qazaqstanda generırlenetin jáne operasııalyq qyzmetiniń eleýli bóligi Qazaqstanda júzege asyrylatyn kásiporyndar kiredi. AIXQI 1000 ball bastapqy mánimen 1 shildede iske qosyldy. Ol óz ádistemesi boıynsha eseptelinip, kópshilikke te qol jetimdi. Al arnaıy qurylǵan Indeks komıteti onyń basqarylýyn baqylaýdy júzege asyrady. Indeksti «Halyk Finance» AQ AIX tapsyrysy boıynsha ázirledi.
«AIXQI ındeksi anaǵurlym ótimdi aksııalar naryǵyndaǵy aýytqýlardy dál qadaǵalaý úshin jáne ony jergilikti jáne syrtqy naryqtarda ınvestısııalyq qarjylyq ónimder qurý kezinde benchmark retinde paıdalaný úshin ázirlendi. Bul sheteldik ınvestorlarǵa da, sonymen qatar qazaqstandyq ınvestorlarǵa da naryqtyń jalpy jaǵdaıyn kórsetetin senimdi «barometr» retinde qyzmet etip jáne jańa ınvestısııalyq sheshimder jasaýǵa arnalǵan alań bolady dep senemiz», dep AIX basqarmasynyń tóraǵasy Renat Bektýrov málimdedi.
Indeks úshin negizgi valıýta retinde teńge paıdalanylady. Indekstiń kórsetkishteri, onyń quramdastary men salmaqtyq koeffısıentteri týraly málimetter kúnine bir ret AIX veb-saıtyndaǵy arnaıy bólimde jarııalanatyn bolady.
«Halyk Finance 2018 jyldan bastap AIX-pen túrli baǵyttarda yntymaqtasady. Jańa ındeksti qurý - bizdiń yntymaqtastyqtyń taǵy bir nátıjesi, ol qazaqstandyq baǵaly qaǵazdar naryǵynyń ashyqtyǵy men tıimdiligin arttyrýǵa qyzmet etedi. Biz ınvestısııalyq menedjer retinde, osy ındeksti iske qosý, bizdiń naryqta jańa ınvestısııalyq jobalaryn damytýǵa qosymsha jaǵdaılar týǵyzatyndyǵyna jáne qazaqstandyq kompanııalardyń baǵaly qaǵazdaryna kapıtal aǵynyn arttyratynyna senimdimiz», dep atap ótti «Halyk Finance» basqarmasynyń tóraǵasy Farhad Ohonov.
