О́ner • 04 Shilde, 2021

Oralda Seıtek kúıshi baıqaýy ótti

193 ret kórsetildi

Oral qalasynda kúıshi-kompozıtor Seıtek Orazalyulynyń týǵanyna 160 jyl tolýyna oraı respýblıkalyq «Kúı qudyreti» dombyrashylar baıqaýy qorytyndylandy. Elimizdiń ár óńirinen kelgen 17 ónerpaz eki kún boıy kúı qudiretin kórsetip, sahnada saıysty, dep jazady Egemen.kz.

Shildeniń alǵashqy jeksenbisi – Ulttyq dombyra kúni atalyp, shyn máninde halyqtyq merekege aınaldy. Talaı sańlaq kúıshi ómirge kelgen Batys Qazaqstan oblysynda ulttyq aspabymyzdy ulyqtaǵan túrli sharalar ótýde. Belgili kúıshi Seıtek Orazalyulynyń bıylǵy mereıtoıy da dál osy kúnge oraılastyrylǵan eken.

«Bul baıqaýdyń maqsaty – Seıtek Orazalyulynyń esimin ulyqtap, tókpe kúı muralaryn keńinen nasıhattaý, óskeleń urpaqtyń oryndaýshylyq baǵdarlamasyna Seıtektiń kúılerin engizý, respýblıkamyzdaǵy dombyrashylardyń kásibı deńgeıin shyńdaý, óner áleminde jas dombyrashylardyń esimin ashý» deıdi baıqaýdy uıymdastyrýshy, Batys Qazaqstan oblystyq halyq shyǵarmashylyǵy ortalyǵy dırektory Máýlet Jubatov.

Baıqaýǵa Nur-Sultan, Almaty, Taldyqorǵan, Taraz, Túrkistan, Qyzylorda, Atyraý oblystarynan jáne Batys Qazaqstan oblysynyń aýdandary men Oral qalasynan 18-45 jas aralyǵyndaǵy 17 kúıshi qatysty.

О́ner baıqaýyna respýblıkaǵa tanymal mádenıet qaıratkerleri, kásibı kúıshiler qazylyq etti. Qazylar alqasynyń tóraǵasy – Qazaqstan Respýblıkasyna eńbek sińirgen mádenıet qyzmetkeri, «Parasat» ordeniniń ıegeri, Ǵarıfolla Qurmanǵalıev atyndaǵy oblystyq fılarmonııa artısi, kúıshi Ermek Qazıev bolsa, alqa quramynda Qazaqstan Respýblıkasy mádenıet salasynyń úzdigi, Nur-Sultan qalasyndaǵy «Táýelsizdik saraıynyń» dırektory Qýanyshbek Muhanǵalıev, Qazaqstan Respýblıkasy mádenıet qaıratkeri, Nurmuhan Jantórın atyndaǵy Atyraý oblystyq fılarmonııa artısi Quttygereı Dúıseev, Qazaqstan Respýblıkasy mádenıet salasynyń úzdigi, Qurmanǵazy atyndaǵy saz kolledjiniń dırektory, kúıshi Nurjan Sertekov, Qazaqstan Respýblıkasy mádenıet salasynyń úzdigi, Qurmanǵazy atyndaǵy Oral saz kolledjiniń oqytýshysy, kúıshi Erbol Ǵubaıdýllınder bar.

Eki kúnge sozylǵan baıqaý barysynda dombyrashylar baıqaý shartyna saı óner kórsetti. Bap pen baq jarysqan, shyn máninde óner ozǵan, kúı óneriniń týy kókte jelbiregen saıys boldy.

«Elorda kúni qarsańynda, El táýelsizdiginiń 30 jyldyǵymen, kúıshilik dástúr mektepteri qalyptasqan, kúı atasy Qurmanǵazy men kúı anasy Dına bastaǵan dúldúl kúıshiler meken etken Bókeı Ordasynyń 220 jyldyǵymen tuspa-tus kelgen búgingi Seıtek Orazalyuly babamyzdyń 160 jyldyǵyna arnalǵan «Kúı qudyreti» respýblıkalyq dombyrashylar baıqaýy Aqjaıyq óńirin rýhanı serpiltti. Jyldyń sońyna deıin kúı merekesi Dına Nurpeıisovanyń 160 jyldyq mereıtoıy aıasyndaǵy sharalarmen jalǵasady. Endeshe, elimizdiń egemen kúninde kókeıge qonǵan qýanysh merekesi — Ulttyq dombyra kúni jasaı bersin!» dep quttyqtady Batys Qazaqstan oblysy ákiminiń orynbasary Baqytjan Narymbetov.

Sonymen, qazylar alqasy Seıtek baıqaýynyń bas júldesine Batys Qazaqstan oblysy Shyńǵyrlaý aýdanynan kelgen ónerpaz Azamat Qalıevti laıyq dep tapty. Oǵan 500 myń teńge báıge berildi.

Baıqaýdyń birinshi oryn júldesin atyraýlyq Qaırat Jumaǵalıev, eki ekinshi oryndy – almatylyq Áıgerim Netalıeva men taldyqorǵandyq Bota Dúngenbaeva ıelendi.

Úsh úshinshi oryn Qyzylorda qalasynan kelgen Baýyrjan Seıdálige, oraldyq Álibek Qýanyshalıevke, almatylyq Temirhan Beıbitke buıyrdy.

Baıqaý jeńimpazdary men qatysýshylaryna baǵaly syılyqtar, marapattar tabys etildi.

«Búgingi qasıetti mereke – Ulttyq dombyra kúni qutty bolsyn! Bul kún – ulttyq qundylyqtarymyzdy ardaqtap, tereń tamyrymyzǵa oı júgirtetin shýaq pen shattyqqa bólengen mereke. О́ıtkeni qazaq halqy úshin dombyra – ulttyq aspap qana emes, qazaqtyń jany men qany, ary men bary, qasıeti men kıesi. Dombyra – halyqtyń qaıǵy men muńyn, qýanysh pen shattyǵyn jetkizgen senimdi serigi, babalardyń úni, Uly dalanyń sazy! Qara dombyranyń qońyr úni sanamyzda saqtalǵan, ulttyq kodymyzda tańbalanǵan. Sondyqtan tarıhymyzdyń asý da asý kezeńinen syr shertken kúı-tolǵaý, syńǵyrly sulý án-áýen qulaǵymyzdan ketpesin, halqymyzdyń qasıetti ulttyq aspaby – Dombyra tórimizden túspesin!» dep tarasty kúı saıysyna qatysýshylar.

 

Batys Qazaqstan

Sońǵy jańalyqtar

«Jasyl» aımaqta birde-bir óńir qalǵan joq

Koronavırýs • Búgin, 09:55

«Pfizer» vaksınasyn qansha adam saldyrdy

Koronavırýs • Búgin, 09:32

Uqsas jańalyqtar