Dástúrli týrnır bıyl el Táýelsizdiginiń 30 jyldyǵy, Qajymuqan Muńaıtpasulynyń 150 jyldyǵyn merekeleý jáne ulttyq sport túrlerin damytý arqyly salamatty ómir saltyn qalyptastyrý, jastardy ulttyq sport túrlerimen shuǵyldanýǵa tartý arqyly olardyń boıynda otansúıgishtik sezimdi qalyptastyrý maqsatynda ótkizildi.
Týrnırdiń ashylý saltanatyna qatysqan Prezıdent Ákimshiligi basshysynyń birinshi orynbasary Dáýren Abaev Memleket basshysy Qasym-Jomart Toqaevtyń Qazaqstan Barysy týrnıriniń qatysýshylaryna arnalǵan quttyqtaý sózin oqyp berdi.
– Qadirli sport súıer qaýym, qurmetti balýandar! Barshańyzdy Qazaqstan Barysy týrnıriniń bastalýymen quttyqtaımyn. Qasterli táýelsizdigimizdiń mereıli jylynda, elorda kúniniń qarsańynda, kúsh atasy Qajymuqannyń 150 jyldyǵyna oraı ótkizilip jatqan bul saıystyń sımvoldyq máni zor. Qazaqstan Barysy týrnıri halqymyzdyń ejelden kele jatqan tól óneri – qazaq kúresin egemendik kezeńinde qaıta jańǵyrtty. Bul saıys babalardyń batyrlyq rýhy men jaýyngerlik sheberligi, urpaqtan-urpaqqa jalǵasyp kele jatqanyn ańǵartady. Sońǵy jyldary keń qanat jaıyp, jan-jaqty dáriptele bastaǵan qazaq kúresi qarqyndy damýda. Oǵan Tuńǵysh Prezıdent – Elbasy Nursultan Nazarbaevtyń júdesi úshin ótetin Qazaqstan Barysy respýblıkalyq týrnır zor úlesin qosyp keledi», delingen Prezıdenttiń quttyqtaý sózinde.
Memleket basshysynyń quttyqtaýynda qazaq kúresin jan-jaqty nasıhattaýdyń arqasynda tól ónerimiz IýNESKO uıymynyń materıaldyq emes mádenı muralardyń tizimine engenin atady.
– Dástúrge aınalǵan dúbirli doda tól ónerimizdi álemge tanytty. IýNESKO uıymy qazaq kúresin adamzattyń materıaldyq emes mádenı murasynyń tizimine qosýy – osynyń aıqyn kórinisi. Balýandardyń óneri jastardyń sportqa qyzyǵýshylyǵyn oıatyp, óskeleń urpaqty otansúıgishtik rýhta tárbıeleýge jol ashady. Búgingi baıraqty básekede balýandarymyzǵa sáttilik tileımin. Ulttyq qundylyqtarymyz aıshyqtala bersin», dep jazylǵan Prezıdenttiń quttyqtaý hatynda.
Bıyl 10 márte ótkizilgen balýandar básekesine Nur-Sultan, Almaty, Shymkent qalalary men oblystardaǵy irikteý jarystarynan súrinbeı ótken 37 balýan baq synady. Onyń ishinde 11 balýan baıraqty dodaǵa alǵash ret qatys-
ty.
«Qazaqstan Barysy» týrnıriniń bıylǵy júlde qory da ózgerissiz qaldy. Jeńimpaz atanǵan balýanǵa ádettegideı
25 000 000 teńge jáne altyn belbeý men altynnan quıylǵan aýyspaly «taıtuıaq» tabystaldy. Ekinshi oryn alǵan sportshyǵa 5 500 000 teńge jáne úshinshi oryndy qanaǵat tutqan balýanǵa 1 800 000 teńge, sáıkesinshe kúmis jáne qola belbeýlermen marapattaldy.
Týrnır Nur Otan partııasy, Mádenıet jáne sport mınıstrligi, Nur-Sultan qalasy ákimdiginiń qoldaýymen, Qazaqstan Barysy qazaq kúresin qoldaý jáne damytý qory men Qazaq kuresi Assosıasııasy uıymdastyrdy.
