Oblys ákiminiń birinshi orynbasary Lázzat Turlashov jınalǵan qaýymdy Elorda kúnimen quttyqtaı otyryp, halyqty qoljetimdi baspanamen qamtamasyz etý úshin óńirde atqarylyp jatqan jumystar týraly aıtyp berdi.
«Bıyl Taldyqorǵanda 120 myń sharshy metrden astam turǵyn úı paıdalanýǵa beriledi. Aǵymdaǵy jyly turǵyn úı máselesin sheshý úshin respýblıkalyq bıýdjetten barlyǵy 5,6 mlrd.teńge bólindi. Sondaı-aq, 155 kottedjdiń qurylysyna jergilikti bıýdjetten 1,5 mlrd teńge bólindi. Munyń bári árbir qazaqstandyqtyń ál-aýqatyn arttyrýǵa baǵyttalǵan syndarly memlekettik saıasattyń kórneki nátıjesi. Mereke qarsańynda qabyldanyp jatqan sharalardyń arqasynda 55 jetisýlyq otbasy Taldyqorǵanda qonys toıyn toılady. Bul bárimiz úshin úlken jáne qýanyshty oqıǵa. Barshańyzdy Elorda kúnimen jáne qonys toıymen shyn júrekten quttyqtaımyn! Ár shańyraqtyń astynda, ár otbasynda árdaıym jaılylyq, órkendeý jáne ózara túsinistik bolsyn!», dedi Lázzat Turlashov.
Jańa qonys ıeleri atynan № 4 balabaqshanyń tárbıeshisi Kúlásh Bekenova sóz sóılep, qalalyq TKSh bólimi qyzmetkerleriniń túsindirý jumystarynyń arqasynda turǵyn úı memlekettik baǵdarlamalarynyń barlyq baǵyttary týraly bilip, «Shańyraq» baǵdarlamasy aıasynda jeke baspanaǵa qol jetkize alǵanyn atap ótti. Ol óz mindetterin oryndaýǵa jaýapkershilikpen qaraıtyn mamandarǵa alǵysyn bildirip, halyqty qoljetimdi turǵyn úımen qamtamasyz etý boıynsha óńirde júrgizilip jatqan sharalardyń belsendiligin erekshe atap ótti.
Lázzat Turlashov «Asar» ońaltý ortalyǵynyń basshysy Eldos Baıalyshbaev pen «Senim» mektebi dırektorynyń oqý isi jónindegi orynbasary Raıgúl Bekovanyń jańa oshaǵyna baryp, gúl shoqtary men estelik syılyqtaryn tabys etti.
Aıta ketsek, kóppáterli turǵyn úıdiń qurylysy ótken jyldyń mamyr aıynda bastalǵan bolatyn. Bas merdiger – «OA NIPI TransNeft» JShS. Úıdiń jalpy aýdany - 5 myń sharshy metrden astam. Páterlerdiń jalpy sany – 55, onyń ishinde 20 úsh bólmeli, 15 bir jáne eki bólmeli, 5 tórt bólmeli páterler.
Elorda kúnine oraı Ile aýdanynda 60 páterli, Qapshaǵaı qalasynda 50 páterli jáne Eńbekshiqazaq aýdanynda 30 páterli turǵyn úı paıdalanýǵa berildi. Kópten kútken qonys toıyn toılaǵandar arasynda kópbalaly otbasylar, jetim balalar, múgedekter, halyqtyń áleýmettik osal toptary sanatyndaǵy ókilder men memlekettik qyzmetkerler bar.
