Qazirgi tańda tótenshe jaǵdaıdyń aldyn alý jáne joıý boıynsha aýdandyq komıssııa jumys isteıdi. Aýdanda barlyǵy 39 jer paıdalanýshy zardap shekkeni belgili boldy. Olardyń jaıylymdary órtenip ketken. Sondaı-aq bir sharýa qojalyǵynyń basshysy 318 bas malynan aıyrylǵan.
Serik Shaıdarov fermerlermen, onyń ishinde maly qyrylǵan sharýa qojalyǵynyń basshysy Saǵyntaı Ábdibekovpen kezdesý barysynda táýelsiz sarapshy shyǵyndy baǵalaıtynyn, sonan keıin naryqtyq quny boıynsha ótemaqy tólenetinin túsindirdi.
Al fermer Saǵyntaı Ábdibekov kómektesýge ýáde berip, qol ushyn sozǵan atqarýshy bılik ókilderine alǵys aıtty.
– Men mal sharýashylyǵymen 1996 jyldan beri aınalysamyn. Osyndaı jaǵdaı bizdiń fermada alǵash ret boldy. О́rt tez tarady. Jel ekpindi bolyp, baǵytyn ózgertti. Biz tipti maldy qaýipsiz jerge shyǵaryp úlgermedik. Endi, bári oıdaǵydaı bolady dep úmittenemin. Oblys ákiminiń orynbasary, jergilikti ákim, aýdan basshysy da menimen baılanysqa shyqty. Kómektesýge ýáde berdi, – deıdi fermer.
Kezdesýde oblys ákiminiń orynbasary jaıylymdyq jáne shabyndyq jerlerden aıyrylǵan fermerlerge de qıyn jaǵdaıdan shyǵýdyń sheshimin usyndy.
– Bir sheshim mynadaı – qazir aýdannyń kóptegen fermerleri zardap shekken qojalyqtarǵa shóp shabý jáne mal jaıý úshin óz jerlerin berýdi usynady. Ekinshisi – bir jylǵa óteýsiz memlekettik jer bólemiz. Mundaı shartty jasaýǵa «Jer kodeksi» múmkindik beredi, – dedi S.Shaıdarov.
Sońǵy resmı málimetterge sensek, Ulytaý aýdanyndaǵy tabıǵı órt oshaqtarynyń barlyǵy sóndirilgen.
