Júlde qory 2 568 750 AQSh dollaryn (erler – 1 892 500, áıelder – 676 250) quraǵan dúbirli dodanyń alǵashqy aınalymynda Rınat Jumabaev sırııalyq Bashır Eıtıdi eki partııada da utty. Endi ol 1/64 fınalda reseılik Aleksandr Motylevpen kúsh synasady. Bıbisara Asýbaeva kýbalyq Ierısbel Mıranda Lıanespen sheberlik baıqasty. Asa shıelenisti ótken básekede qazaq qyzy 1,5:0,5 esebimen basym tústi. Kelesi kezeńde Bıbisara óziniń otandasy Jansaıa Ábdimálikpen saıysqa túsedi.
Bir ókinshitisi, álem kýbogy «nokaýt júıesi» boıynsha ótetindikten osy mejede jeńgeni jarysty jalǵastyrady da, jeńilgeni kórermender qataryna qosylady. Sol sekildi Dınara Sádýaqasova da týrnırdi 1/32 fınaldan bastaıdy. Ol polshalyq Klaýdııa Kýlen men amerıkalyq Djennıfer Iý arasyndaǵy kezdesýdiń jeńimpazymen jolyǵady.
Esterińizge sala keteıik, Qara teńiz jaǵalaýynda ótip jatqan jarysta 309 (erler – 206, áıelder – 103) oıynshy baq synaýda. Qatysýshylardyń qatarynda álem chempıony Magnýs Karlsen, Fabıano Karýana, Levon Aronıan, Shahrııar Mamedıarov, Aleksandr Grıshýk, Ekaterına Lagno, Marııa men Anna Mýzychýk jáne taǵy basqa áıgili shahmatshylar bar.
