Avtobýstarda, tramvaılarda jáne mıkroavtobýstarda jolaqysyn SMS, QR-kod jáne «Oskemencard» kólik kartasy arqyly tóleýge bolady.
Qazir qalanyń barlyq qoǵamdyq kólikteri valıdatorlarmen, GPS-trekerlermen, borttyq kompıýterlermen jáne mobıldi termınaldarmen jabdyqtalǵan.
Jolaqysynyń avtomattandyrylǵan tólem júıesine 9 marshrýt (№ 228, 229, 230, 246, 253, 255, 260, 261 jáne 262), 4 avtobýs (№12, 24, 60 jáne 67) jáne 3 tramvaı baǵyty (№ 1, 3 jáne 4) qosylǵan.
Júıe tamyzdyń sońyna deıin barlyq qalalyq marshrýttarda iske qosylmaq.
Jolaqysyn búkil álemde keńinen taralǵan dástúrli tásil – kólik kartasy boıynsha da tóleýge bolady. Karta qalanyń 34 núktesinde satylady, shyǵarylady jáne toltyrylady. Bul kartanyń quny 500 teńgeni quraıdy. Jeńildik qarastyrylǵan azamattarǵa atalmysh kólik kartasy mektep kartasy sııaqty tegin beriletin bolady.
Budan bólek, «Oskemenbus» mobıldi qosymshasy da iske qosyldy. Onda avtobýs qozǵalysyn qadaǵalaýǵa, qoǵamdyq kólikterdiń júrý kestesi men naqty ýaqytyn tekserýge jáne mejeli jerge deıin barýdyń yńǵaıly marshrýtyn qurýǵa bolady. Qosymsha iske qosylǵan sátten bastap ony 100 myńnan astam adam júktep alǵan.
