Belgili sýretshiniń irgeli eńbegi el ishinde úlken bedelge ıe. Ásirese óner salasynda júrgen jandar á degennen-aq tanıdy. Biz avtordyń «Portret sestry» atty týyndysyn «Ápke» dep tárjimaladyq. Sebebi shyǵarmanyń dúnıege kelýine osy bir aıaýly sóz negiz bolǵandaı. Alystan bir meıirim esedi. Ulttyq mýzeıde ornalasqan kartına oqyrmannyń oı ýysynda uzaq saqtalatyny anyq.
1970-jyldardaǵy qazaq keskindeme óneri 1960-jyldardaǵy jańalyqty logıkalyq jáne dáıekti túrde damyta otyryp, ózindik qoltańbasyn qaldyrdy. Beınelerdiń sándik mánerliligimen, yrǵaqty tereńdigimen jáne sımvoldyq sharttylyǵymen kórermendi eleń etkizdi. Árbirden soń alpysynshy jyldardaǵy romantıkalyq tujyrymdamalardy baıyta otyryp, ulttyq keskindeme mektebiniń tarıhyndaǵy jańa mańyzdy kezeń túzdi. Osy kezeńde portret basqa janrlar ıerarhııasynda ózin jaı ǵana nyǵaıtyp qoıǵan joq, kóshbasshysyna aınaldy. Salıhıtdın Aıtbaev osy janrda jemisti eńbek etken sýretshilerdiń biri bolatyn.
Qylqalam sheberiniń «Ápke» týyndysy realıstik mánermen jazylǵan. Sýretshi kenep betine jumsaq oryndyqta otyrǵan boıjetkendi beınelegen. Avtor pishindeý úshin tańba túrin paıdalanady. Qyzdyń kıimindegi tústerdiń jalpaq tegis tańbalary sýyq naqyshty panno jasap tur. Sýretshi qyzdyń artyndaǵy fondy berý úshin túster men tańbalardy erekshe oınata otyryp, reńi óte ádemi kilem toqıdy.
Ár alýan pishinderdiń boıaýlary ártúrli baǵytta jaǵylǵan. Kartınanyń búkil betin toltyryp turǵan úılesimdi órilgen úshburyshtar men sharshylardyń arasynda portret ıesiniń beti men qoly erekshe kózge túsedi. Boıjetkenniń baısaldy júzi, oıly kózderi nazardy ózine tartady. Bir qolyn kitaptyń ashyq betine qoıǵan. Ol kóńilin bir sátke oqýdan bólip, bizge qarap turǵandaı...
Avtor úshin aıaýly beıneniń asqaq portretin jazý ońaı bolmaǵan sekildi. Sulýdyń júzine úńilseńiz bir kirbiń bar. Oqymysty arýdyń oıly kózqarasy siz ben bizdi ártúrli oıǵa jeteleıdi. Syrtqy bolmysyna emes, jan dúnıesine jaryq shashqandaı. Boıaýlar bizge birnárse aıtqysy kelip turǵandaı...
Shynynda, Salıhıtdın Aıtbaev óz týyndylarynda balalardyń, áıelderdiń, qarttardyń beınesin bar yntasymen jazady. Mundaǵy qupııa keıipkeriniń syrt kelbeti emes, ishki álemi. Sheber kez kelgen modeliniń jan-kúıin janarynan sóıletedi.
