Qoǵam • 20 Shilde, 2021

Báıterek aýdany ákimi qatań sógis aldy

1487 ret kórsetildi

Batys Qazaqstan oblysyndaǵy jaǵajaılardyń birinde bolǵan arsyz oqıǵa óńir basshysy Ǵalı Esqalıev jetekshilik etetin koronavırýsqa qarsy kúres jónindegi jedel shtab otyrysynda talqylandy dep habarlaıdy Egemen.kz.

Oqıǵa bylaı bolǵan: 17 shilde kúni keshkisin Báıterek aýdanyndaǵy Jaıyq aýyly tusynda jaǵajaıda 150-deı halyq jınalǵan kópshilik is-shara ótken. Arnaıy qurylǵan, qyzyl-jasyl shamdarmen jabdyqtalǵan sahnada eki erkek pen bir áıel tyr jalańash sheshinip, bılep jatqany túsirilgen beınejazba az ýaqytta halyqqa tarap, jurttyń ashý-yzasyn týǵyzdy. Birinshiden, pandemııaǵa baılanysty «qyzyl aımaq» mártebesindegi oblysta mundaı kópshilik is-shara qalaı uıymdastyrylǵan? Ekinshiden, ádep qaǵıdalaryn aıaqqa taptaǵan mundaı arsyz kórinisti ashyq dalada ótkizýshiler kimder? 

«Báıterek aýdanyndaǵy Trekın aýyldyq okrýgine qarasty Jaıyq aýylynda jańa jaǵajaıdyń ashylýyna oraı is-shara ótip, oǵan 150-deı adam qatysqan. Bul jóninde bizdiń mekemege polısııa departamentinen is materıaldary kelip tústi. Osy is-sharanyń uıymdastyrylýyna muryndyq bolǵan kásipker Dúısekenovke 670 myń teńge aıyppul salý jóninde sheshim qabyldaǵaly otyrmyz», dedi Batys Qazaqstan oblystyq sanıtarlyq-epıdemıologııalyq baqylaý departamentiniń basshysy Muhamǵalı Aryspaev.

Batys Qazaqstan oblystyq polısııa departamenti basshysynyń birinshi orynbasary, polkovnık Merhat Ájenovtiń aıtýynsha, jaǵajaıdaǵy arsyz kórinisti uıymdastyrǵandar «Usaq buzaqylyq» babymen jaýapqa tartylady. Qazir kináli adamdar anyqtalyp jatyr.

Bir qyzyǵy, aýdanda resmı túrde ashylǵan eki-aq jaǵajaı bar eken. Joǵarydaǵy oqıǵa esepke alynbaǵan ári jekemenshik aýmaqqa tıesili jerde ótken kórinedi. Sondyqtan da monıtorıngtik toptardyń nazaryna túspeı qalǵan. Báıterek aýdanynyń ákimi Marat Toqjanov bolǵan oqıǵanyń mán-jaıyn anyqtap jatqanyn, kináliler jaýapqa tartylatynyna ýáde berdi.

«Bir top adam karantın talaptaryn buzyp, mádenıetke jat qylyqtarymen oblysty el aldynda qarabet qyldy. Osyndaı kórgensiz áreket jasaǵandardy, beıádep is-sharany ótkizýge atsalysqandardy qatań jazalaý qajet. Báıterek aýdanynda karantındik talaptardyń saqtalýyn qadaǵalaý tıisti deńgeıde emestigi belgili boldy. Sol sebepti aýdan ákimi Marat Toqjanovqa qatań sógis jarııalaımyn. Osy aýdan ákiminiń ıdeologııaǵa jaýapty orynbasaryna, oqıǵa bolǵan aýyldyń ákimi men oqıǵaǵa jol bergen monıtorıng top basshysyna qatysty tıisti deńgeıde tártiptik shara alýdy tapsyramyn. Jaǵajaıdy jalǵa bergen kásipkerdi jáne jalǵa alǵandardy qatań jazalaǵan durys. Demalys kúnderi jaǵajaılar men basqa da kópshilik tynyǵatyn oryndar jabylsyn degen bas sanıtar dárigerdiń usynysyn qoldaımyn», dedi oblys ákimi Ǵalı Esqalıev.

Sońǵy jańalyqtar

Amanatqa adaldyq

Ádebıet • Keshe

Jantórın jańalyǵy

Kıno • Keshe

Azattyq úshin arpalysqan

Tarıh • Keshe

Dıllıan Ýaıt qaharyna mindi

Kásipqoı boks • Keshe

Uqsas jańalyqtar