Ortalyq málimeti boıynsha, Serik Temirhanuly - №2 kardıohırýrgııa bólimshesiniń meńgerýshisi jáne júrek-qan tamyrlary hırýrgııasy salasyndaǵy úzdik mamandardyń biri boldy.
«Serik Temirhanuly uzaq ýaqyt boıy densaýlyǵyna shaǵymdanyp, arterııalyq gıpertonııa, 2 tıpti qant dıabetimen kúresken. Anyqtalmaǵan sebepter boıynsha, 2021 jylǵy 18 shilde, jeksenbi kúni Serik Temirhanulynyń júregi toqtap qaldy. Ol jedel járdem kóligimen úıden «Ulttyq ǵylymı kardıohırýrgııa ortalyǵy» KEAQ-ǵa jetkizildi. Uzaq reanımasııalyq sharalar júrgizilip, ony EKSMO apparatyna qosý qajet boldy. Jaǵdaı qan ketýmen kúrdelene tústi. Serik Temirhanulyna qan kóp qajet boldy. Onymen qan ortalyǵy qamtamasyz etken. Qan ortalyǵynyń qoryn tolyqtyrý úshin týystary qan tapsyrý týraly habarlama taratty.
Búgin, 2021 jyldyń 20 shildesinde Serik Temirhanuly qaıtadan júrek ustamasyna ushyrap, qaıtys boldy», delingen habarlamada.
Ol júrektiń jasandy sol qarynshasyn ımplantasııalaý boıynsha operasııa jasaǵan álemdegi eń jas kardıohırýrg retinde Qazaqstan kardıologtary qaýymdastyǵymen marapattalǵan.
«Densaýlyq saqtaý isine qosqan úlesi úshin» belgisimen jáne Ulttyq nagrada - «Eren eńbegi úshin» medalimen marapattalǵan.
«Áriptester men emdelýshiler ony meıirimdilik pen kásibıligi úshin jaqsy kórdi jáne qurmettedi. Júrek ortalyǵynyń ujymy Serik Temirhanulynyń týǵan-týystaryna, jaqyndary men dostaryna shyn júrekten kóńil aıtady. Ol týraly jarqyn estelikter bizdiń júregimizde máńgi qalady», dep jazylǵan habarlamada.
