Oblystaǵy 6 okrýg boıynsha 2 kandıdattan, 28 okrýgte 3, 5 okrýgte tórt, al bir okrýgte 6 úmitkerden tirkelgen. Oblys ortalyǵyna jaqyn Syrdarııa aýdanyndaǵy 3 okrýgte turǵyndar laıyqty úmitkerge daýys berdi.
Osy aýdandaǵy saılaý ótken 3 aýyldyń biri – Naǵı Ilııasov atyn ıelengen irgeli eldi meken. Aýyl sharýashylyǵy turalaı bastaǵan toqsanynshy jyldary qıyndyq tartqan eldi meken keıin jergilikti isker azamattardyń janashyrlyǵynyń arqasynda jańǵyryp, aýdan ortalyqtarymen básekege túserdeı keıipke engen. Gúlzarlar men ortalyq alańdaǵy sýburqaq, qalada kezdese bermeıtin saýda úıleri – búgingi aýyl turmysynyń aıǵaǵy. Mundaǵy áleýmettik nysandardyń da qatary tolyq. Bıznes pen bılik arasyndaǵy áriptestiktiń arqasynda aýylda stadıon, jergilikti ákimshilik ǵımaraty salyndy. Qazir aýyldaǵylardyń deni osyndaǵy «Maǵjan jáne K» seriktestiginde eńbek etedi. Memlekettik qoldaýdy utymdy paıdalanyp, mal basyn kóbeıtip jatqandar da bar. Keshegi kúni aýyldaǵy 1 330 saılaýshy bolashaqta osy irgeli aýyldyń tizginin ustaıtyn úmitkerdi tańdady.
Aýyldaǵy eń alǵashqy daýys berýshiler egistik alqapta eńbek etip jatqan dıqandar bolypty. Erterek kelgen olar saılaý ýchaskesiniń ashylýyn kútip, sanıtarlyq talaptarǵa saı tańdaýyn jasap, jumystaryna jónelipti.
Saılaý ýchaskesiniń tóraǵasy Ilııas Anafııaev saıası jańǵyrýdyń jańa kezeńine turǵyndardyń sergek qarap otyrǵanyn aıtyp ótti.
Osy kúni oblys boıynsha 313 baıqaýshy saılaý barysyn baqylady. Solardyń biri – «Syr bolashaǵy» jas memlekettik qyzmetshiler klýby» qoǵamdyq birlestiginiń atynan qatysyp otyrǵan Murat Qaımoldaev. Ol tańnan bastap daýys berýshiler qatary úzilmegenin aıtady.
– Tańdaýdyń aýyl ekonomıkasyna, ony damytýǵa, eldiń bolashaǵyna tikeleı qatysy baryn jaqsy túsingen saılaýshylar naýqannan shet qalyp jatqan joq. Ásirese, jastardyń belsendiligi qatty baıqalady. Saılaý ýchaskesinde sanıtarlyq talaptyń saqtalýyna da qatty mán berip, kelýshilerdi sol talaptarǵa saı qabyldap jatqanyna tánti boldym, – deıdi ol.
Batyr esimin ıelengen aýylda jumyssyz júrgen jan joqtyń qasy. Áleýmettik máselelerdiń sheshilýine jergilikti isker azamattar qoldaý kórsetip otyr.
Degenmen de osyndaǵy eki myńnan astam turǵynnyń turmysyn áli de jaqsartyp, kásipkerlikti damytý baǵytynda atqarylar is kóp. Jergilikti turǵyndar úsh úmitkerdiń arasynan osy talap údesinen shyǵyp, el senimin arqalaı alady degen azamatqa daýys berdi.
Qyzylorda oblysy
