Foto: baspasóz qyzmeti
Is-sharaǵa Úndistannan – Radjnath Sıngh, Qazaqstannan – general-leıtenant Nurlan Ermekbaev, Qytaıdan – general-polkovnık Veı Fenhe, Qyrǵyzstannan – general-maıor Taalaıbek Omýralıev, Pákistannan – Pervez Hattak, Reseıden – armııa generaly Sergeı Shoıgý, Tájikstannan – general-polkovnık Sheralı Mırzo jáne О́zbekstannan – general-leıtenant Bahodır Kýrbanov qatysty.
Kelissóz ShYU О́ńirlik terrorızmge qarsy qurylymy (О́TQQ) Atqarýshy komıtetiniń dırektory Djýmahon Gıesov jáne Belarýs qorǵanys mınıstri general-leıtenant Vıktor Hrenınniń qatysýymen ótti.
Keńeske qatysýshylar halyqaralyq jáne óńirlik qaýipsizdiktiń ózekti máseleleri tóńireginde pikir almasty. Aýǵanstan aýmaǵynda oryn alyp jatqan qaýip-qaterdi beıtaraptandyrý boıynsha yqtımal áreketterdi talqylady.
Qazaqstannyń Qorǵanys mınıstri general-leıtenant Nurlan Ermekbaev ShYU sheńberindegi yntymaqtastyqty damytýdyń, atap aıtqanda, terrorızmge qarsy is-qımyl, Aýǵanstandaǵy ahýal, daǵdarysty jaǵdaıyn boljaý, aldyn alý sharalaryn qabyldaý jáne ózara is-qımyl formatyn damytý, onyń ishinde jedel aqparat almasýdy jolǵa qoıý sııaqty ózekti máselelerdi qozǵady. Sonymen qatar jahandyq deńgeıde beıbitshilikti, turaqtylyq pen qaýipsizdikti nyǵaıtý turǵysynan Sırııa máselesine toqtalyp, Astana prosesi barysynda qol jetkizilgen ýaǵdalastyqtar osy eldegi soǵystyń aıtarlyqtaı dárejede toqtatylýyna jáne IGIL uıymy (Qazaqstanda tyıym salynǵan) óktemdiginiń jaı-kúıine yqpal etkenin atap ótti.
Sonymen birge, vedomstvo basshylary Reseı «Beıbit mıssııa – 2021» birlesken terrorızmge qarsy áskerı komandalyq-shtabtyq oqý-jattyǵýlaryn ótkizýdi talqylady. Ol bıylǵy jylǵy qyrkúıekke josparlanǵan.
Kelesi keńes 2022 jyly О́zbekstanda ótedi.
