Jeńiske san emes, sapa jeteleıdi

Ázirge  eldiń ánuranyn shyrqatatyn sportshy bolmaı tur. Endigi bar úmit Elena Rybakınada bolmaq. Keshe qazaq­standyq tennısshi Olımpıadanyń jartylaı fınalyna joldama aldy. Bul elimizdiń tennısi úshin de, Rybakına úshin de tarıhı jetistik. Elena shırek fınalda ıspanııalyq Garbıne Mýgýrýsany jeńdi ‒ 7:5, 6:1. Match aldynda Grand slam jarystarynyń je­ńimpazy Mýgýrýsa favorıt edi. Biraq jerlesimiz ótkizgen úsh oıynnyń bar­lyǵyn eki setpen aıaqtady. En­digi qarsylas ‒ Belında Benchıch. Shveı­sarııalyq tennısshi reıtıngte joǵary turǵanymen kortta kútpegen jaǵdaı kóp bolady. Onyń ústine, Rolan Gar­rostyń shırek fınalyna, Ýımbl­don­nyń tórtinshi aınalymyna deıin jetken Rybakına qatarynan úsh týrnırde jaqsy oıyn órnegin kórsetip keledi.

«Meniń búgingi qarsylasym óte tájirıbeli. Sondyqtan match qıyn ót­ti. Jeńiske jetem degen oımen shyq­­­tym. Aldyńǵy matchtarda joq jer­den qatelesip, kerek emes jerde upaı joǵalttym. Búgingi oıynda sol qa­telikterdi jibermeýge tyrys­tym. Qar­sylasqa múmkindik bermeý úshin ba­rymdy saldym. Sol sebepti, bú­gingi jeńisim úshin óte qýanyshtymyn. Jartylaı fınaldaǵy qarsylasymmen buryn oınap kórmegenmin. Tek jattyǵý kezderinde ǵana jolymyz túıisti. Aldaǵy oıyn da ońaı bolmaıdy. Dopty oıynǵa sátti qosý arqyly upaı jınaýǵa tyrysamyn. Sebebi bul meniń qolymnan keledi», dedi Rybakına.

Altyn júlde alady-aý degen boks­shymyz Bekzat Nurdáýletov kútpegen jerden alǵashqy jekpe-jeginde jeńilis tapty. 81 kıloǵa deıingi salmaqta baq synaǵan Bekzat reseılik Imam Hataev­pen kezdesken bolatyn. Tartysty kezdesýde tóreshiler 4:1 esebimen jeńisti reseılik boksshyǵa berdi. 57 kıloǵa deıingi salmaqta synǵa túsken Serik Temirjanov amerıkalyq Dıýk Regannan 0:5 esebimen jeńilip qaldy. 75 kıloǵa deıingi salmaqta judyryqtasqan Na­dejda Rıabes álem chempıonatynyń qola júldegeri, kanadalyq Tamara Tıbomen kezdesip 1:4 esebimen esesi ketti.

Olımpıadada basty úmitkerdiń biri bolǵan Dmıtrıı Balandın 200 metr qashyqtyqty brass ádisimen júzýden fınalǵa óte almady. Negizi, Balandınniń nátıjeleri Rıo Olımpıadasynan keıin tómendeı bastaǵan-dy. 2017 jylǵy álem chem­pıonatynda júldesiz qaldy. 2019 jylǵy álem chempıonatynda 2:08,25 mınýt kórsetkishpen 7-oryn alǵan edi. Soǵan qaramastan, otandasymyz kem degende úzdik úshtikten kórinip qalar dep oılaǵan edik. Alaıda Rıo Olımpıadasynda 2:07,46 mınýt kórset­kishpen altyn alǵan jerlesimiz Tokıoda 200 metrdi 2:09,22 mınýtta júzip ótip, bar-joǵy 11-orynǵa turaqtady.

Al Alekseı Lýsenkony kóp maman London Olımpıadasynyń chempıony Aleksandr Vınokýrovtyń jetistigin qaıtalaıdy dep sengen edi. Al senim artqan veloshabandozymyzdy, tipti úzdik otyzdyqtyń qatarynan da kóre almadyq. Tokıoda velosporttan erler arasyndaǵy báseke tolyq aıaqtalyp, jeńimpazdar men júldegerler tizimi anyqtaldy. Qazaqstandyq Alekseı Lýsenko jekeleı syn qorytyndysy boıynsha 32-orynnan kórindi. Ol 44,2 shaqyrymdy 1 saǵat 02 mınýt 21.67 sekýndta júrip ótti. Lýsenko jarys jeńimpazy atanǵan slovenııalyq Prımoz Roglıkten 7 mınýt 17.48 sekýndqa qalyp qoıdy.  Bul básekede kúmis júldeni Tom Dýmýlın (Nıderland), qolany Rohan Dennıs (Aýstralııa) enshiledi. 

Dzıýdoshy Islam Bozbaev úshin Olımpıada sátti bastalyp edi. 90 kılo salmaqta baq synaǵan Bozbaev alǵashqy aınalymda brazılııalyq Rafael Makedomen kezdesken bolatyn. Jerlesimiz qarsylasyn nebári 31 sekýndta «ıppon» ádisimen jeńgenimen, ekinshi aınalymda jeńilip qaldy. Ázerbaıjandyq Mamadáli Mehdıevke qarsy ótken kezdesýdiń negizgi ýaqy­tynda jeńimpazdar anyqtalǵan joq. Al qosymsha ýaqytta ázerbaıjandyq balýan ádis jasap, «vazarı» ádisimen Bozbaevtan basym tústi. Osylaısha, dzıýdodan Qazaqstan quramasy Tokıo Olımpıadasyn Eldos Smetovtiń jalǵyz ǵana qola júldesimen aıaqtady.

Qazaqstandyq sadaqshy Sanjar Musaev ta alǵashqy aınalymda qarsy­lasyna ese jiberdi. Qytaı sportshysy Dapeng Vangpen synǵa túsken ol, 6:4 esebimen qarsylasyna jol berdi.

Sporttyq gımnastıkadan úsh jat­tyǵý boıynsha fınalǵa joldama alǵan Mılad Karımı keshe kópsaıystan synǵa tús­kenimen, júldegerler qatarynan kó­rine almady. Esterińizge sala ketsek, Mılad erkin jattyǵýda 8-oryn ıele­nip, fınalǵa joldama alǵan-dy. Al gımnastıkalyq kermedegi jattyǵý bo­ıynsha irikteýde 14,766 upaı jınap, ekinshi nátıje kórsetken edi. Dál osy jattyǵý boıynsha 3 tamyzda ótetin saıysta Mıladtan medal kútemiz.

Sondaı-aq tennısten aralas jup­tyq saıystyń alǵashqy kezeńinde Iаroslava Shvedova men Andreı Golýbev japonııalyq Enna Shıbahara jáne Ben Maklaklan jubyna qarsy óner kórsetti. Eki setke sozylǵan matchta qazaq­standyq tennısshiler 3:6, 6:7 esebi­men qarsylasqa jol berdi.

Almas MANAP,

«Egemen Qazaqstan» – Tokıodan (Japonııa)