Aımaqtar • 29 Shilde, 2021

Aqtóbe oblysynda 8 myń gektar jerdi qurt jaılady

Aqtóbe oblystyq aýyl sharýashylyǵy basqarmasynyń basshysy Isataı Espaǵanbetov, basqarma basshysynyń orynbasary Asyljan Áptıev jáne oblystyq aýmaqtyq ınspeksııasynyń basshysy Baqytǵalı Shaıhıev oblys jerinde taralyp jatqan shabyndyq kóbelegine qatysty baspasóz máslıhatyn ótkizdi, dep habarlaıdy Egemen.kz. Brıfıngtegi aqparattar «Aqtóbe» gazetiniń saıtynda jarııalanǵan

Janbolat Kenjeǵul

Zııankesterdi joıý úshin hımııalyq óńdeý jumystary bastalyp ketti. Olar oblystyń 8 myń gektar jerine tarap úlgergen. Biraq taralý kórsetkishi kún saıyn ózgerip otyrady. Onyń 5400 gektary sharýa qojalyqtarynyń jeri. Egisi men baý-baqshasy kóp Mártók aýdanynyń 4 myń gektar, Qarǵaly aýdanynyń 1800 gektar, Alǵa, Muǵaljar, Hromtaý aýdandarynyń 1000 gektarǵa jýyq jerlerine ýlaý jumystary júrgizilmek. Buǵan tehnıkalar bar. Dáriler de tolyǵymen jetkilikti.

Basqarma basshysynyń aıtýynsha, ár sharýa qojalyǵy óz jerin ózderi ýlaýy tıis. О́ıtkeni memleket tarapynan tek shegirtkege qarsy tegin kómek beriledi. Biraq zııankesterdi joıatyn dáriniń 50 paıyzyn úkimet sýbsıdııa qylyp qaıtarady. Eger sharýa qojalyqtary óz jerin ýlaýǵa tehnıkasy, quraldary basqa da múmkindikteri bolmasa, Aqtóbe qalasyndaǵy mekemelerdiń aqyly qyzmetine júgine alady. О́risti ýlaǵannan keıin malǵa qaýip bar. Sondyqtan okrýg ákimderi bul jumysty tııanaqty uıymdastyrýy kerek. Mal jaıylymyn ózgertip, aldyn ala halyqqa eskertip, ýlanǵan jerlerge belgiler qoıylady.

— Fıtosanıtarlyq normatıvterdi, fıtosanıtarlyq esepke alý nysandaryn, sondaı-aq olardy usyný qaǵıdalaryn bekitý týraly QR Aýyl sharýashylyǵy mınıstrliginiń 2015 jylǵy 29 maýsymdaǵy №584 buıryǵyna sáıkes shabyndyq kóbelegin ýlaýdyń mynadaı tártibi bar. Aýyl sharýashylyǵy daqyldarynyń jańadan kóktep kele jatqan ýaqytynda 1 sharshy metr jerde 5-10, al qazirgi kezde 1sharshy metr jerge 20 qurt bolsa ýlaý kerek. Al oblysymyz jerindegi shabyndyq kóbelegi ár jerde ártúrli. Olar jýsan, aramshóp, maıly daqyldar jáne kókónisterge túsip otyr. Qazirgi tańda ýlap jatyrmyz, — deıdi oblystyq aýyl sharýashylyǵy basqarmasynyń basshysy Isataı Espaǵanbetov.

Bul 8-10 jyl saıyn paıda bolatyn zııandy qurttar. Aýa raıynyń da áseri bar. Jańbyrdan keıin qaýlaıdy. Jaqynda oblysymyzdyń barlyq aýdandaryna jaýyn jaýdy. Odan keıin kún ysydy. Shabyndyq kóbeleginiń paıda bolyp, kóbeıýine qolaıly bolyp otyr. Bir qýanarlyǵy, ázirge shabyndyq jerlerde bul qurttardyń belgisi baıqalǵan joq.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz