Aulafit aýrýdan qorǵaıdy

«Medısına salasynda júrgenime 50 jyl boldy. Mamandyǵym – provızor. Jasym 75-te. Qazirgi epıdemııalyq ahýaldy eskere otyryp, men de vaksına aldym. Ekpeden eshqandaı janama áser bolǵan joq. Ekpege qarsy pikir aıtatyn adamdardy túsinbeımin. Kezinde sheshek, oba, sibir jarasy sekildi juqpaly indet vaksına arqyly toqtatylǵan. Týberkýlezge qarsy vaksına sábıge perzenthanadan bastap salynady. Osyndaı jumystardyń nátıjesinde elimiz týberkýlez indetin jeńdi dep aıtýǵa bolady. Qazir áleýmettik jelide ekpege qarsy jeke pikir aıtamyz dep halyqtyń oıyn ózgertip júrgen adamdar kóp. Basqa salany qaıdam, biraq medısına salasyna qatysy joq keı turǵyndar vaksına týrasynda pikir aıtqysh bolyp aldy. Iаǵnı bilimi joq bilgishter qaptap ketti», deıdi medısına salasynyń ardageri Maqsot Bergen.

Maqsot Qabyshuly egde tartqan jasyna qaramastan árdaıym qoǵamdyq jumystardyń basynda júredi. О́zi – Batys Qazaqstan oblystyq Ardagerler keńesiniń tóraǵasy. Sońǵy jyldary toqyrap qalǵan qoǵamdyq uıymnyń jumysyn jandandyryp, aǵa urpaqtyń tájirıbesi men aqyl-keńesi qajettigin dáleldeýde. Ásirese byltyr pandemııa bastalǵaly bul tilsiz jaýdy tek ǵylymı jol – vaksınamen jáne salamatty ómir saltymen jeńe alatynymyzdy aıtyp, aǵamyzdyń jarǵaq qulaǵy jastyqqa tımeı júr.

«Qazaqstanda 7 500-den asa tirkelgen dári-dármek túri bar. Ár dáriniń óziniń qarsy kórsetilimi nemese janama áseri bolady. Mysaly, antıbıotıkterdi alaıyq. Biraq olardy qoldanbasaq, tur­ǵyn­dardyń densaýlyǵy men ómirine qaýip tóner edi. Sol sebepti koronavırýs­ke qarsy vaksınanyń da mańyzy zor. О́z basym 18 jastan asqandarǵa ekpe alýǵa keńes berer edim. AQSh halqynyń 70 paıyzy búginde vaksına alyp otyr ǵoı», deıdi ardager.

Maqsot Bergen osy pandemııadan eń aldymen aldyńǵy býyn – aǵalar zardap shekkenin aıtady. Vırýstyń kári aǵzaǵa tıgizer áseri óz aldyna. Munyń taǵy bir sebebi bar: el ishinde kórshi-kólem, aǵaıyn-týys, aýyl turǵyndarynyń basyn qosyp, qaıtys bolǵandardyń úshi, jetisi, qyrqy men 100 kúndigin beretin rásim bar. Bul óz kezeginde indettiń órshýine ákelip soǵýda. Onyń ústine mundaı jerde kóbine qarııalar júredi. «Sondyqtan mundaı rásimderdi turǵyndardyń basyn qospaı-aq, otbasy múshelerimen atap ótken jón. Al qarııalar óz densaýlyǵyna kóńil bólip, taza aýada kóbirek júrip, tynys jattyǵýlaryn jasaý kerek», deıdi ardager.

Bul usynys jaqynda qala, óńir basshylary men qoǵamdyq uıymdar tarapynan da qoldaý tapty. Oral qalasynda «densaýlyq alańdary» kóbeıdi. Al jaqynda ǵana qolǵa alynǵan aulafit atalǵan tyń jobanyń da qoldaýshylary kóp bolatyn túri bar. Iаǵnı qalanyń saıabaqtarynda, demalys alańdarynda – ashyq aspan astynda jınalǵan turǵyndar ásem áýen yrǵaǵymen bı bılep, túrli jattyǵýlar jasaıdy.

Osyndaı jıynnyń biri jaqynda Zashaǵan kentinde uıymdastyryldy. Oral qalalyq №1 emhanaǵa qarasty saýyqtyrý bóliminiń nusqaýshysy Saýle Shókeevanyń nusqaýymen tynys alý júıesi qyzmetin nyǵaıtyp, ókpeni kúsheıtetin, jalpy densaýlyqty kúsheıtýge arnalǵan jattyǵýlar kesheni jasaldy. Jattyǵýǵa oblystyq Ardagerler keńesiniń tóraǵasy Maqsot Bergen, Oral qalasy ákiminiń orynbasary Erlan Ǵalıev, Oral qalalyq ardagerler keńesiniń tóraǵasy Mynataýbıik Ánesov, Batys Qazaqstan oblystyq máslıhatynyń depýtaty Shattyq О́tebalıeva, Zashaǵan kentiniń ákimi Aqqalı Áýbekerov, qalalyq dene shynyqtyrý jáne sport bóliminiń basshysy Artýr Sherǵalıev, sport jáne mádenıet qyzmetkerleri, ardagerler, eriktiler, kenttiń qarapaıym turǵyndary qatysty.

Batys Qazaqstan oblysy