Áp etken bette kópbalaly otbasylar men jalǵyzilikti jandardyń abdyrap qalǵany da ras. Dári-dármek, qorǵanys quraldary jetispeı jatty. Tótennen kelgen dertke daıyn emes edi. Alypqashty, árqıly, ótirik-shyny belgisiz sóz de kóbeıdi. Dátke qýaty der shaǵynda memleket tarapynan kómek kórsetildi. El ishindegi qaýqary bar, jigerli jastar da qol qýsyryp qarap otyrǵan joq. Eriktiler shoqtaı ekshelip, toptasyp, el ishinde áleýmettik jaǵynan az qamtamasyz etilgen azamattardyń júdep qalmaýyn nazarda ustady. Osy áreketterimen-aq týǵan eline tulǵa bolatyn shyn patrıot ekenderin kórsetip berdi.
Aýdanda búgingi tańda 14 eriktiler ortalyǵy jumys isteıdi. Olar jany izgi, qoly ashyq, kómekke daıyn elgezek 150 adamnyń basyn qurap otyr. El qamyn jegen osy toptaǵy adamdar qandaı qıyndyq týyndasa da tótep berip, ózderin ǵana emes, ózgeni de synaqtan alyp shyǵatyndaryna senimdi. Bulardyń qareketi el ishindegi birlikti bekemdeı tústi. Al birlik bar jerde berekeniń ózinen-ózi úıiriletini belgili. Áleýmettik baǵytta jumys isteıtin eriktiler ótken qysta aýdandaǵy jalǵyzilikti jandardyń tizimin jasap, olardyń muń-muqtajdaryna udaıy nazar aýdaryp otyrdy. Qysta qar tazalasa, kóktemde qyzyl sýdyń qaýpinen qutqarý sharýasyna belsene aralasty. Aýdandaǵy 97 jalǵyzilikti zeınetkerge, 13 kópbalaly otbasyǵa, 12 jalǵysbasty anaǵa kómek kórsetti.
Bıyl aýdan eriktileri 123 shara uıymdastyrdy. Olardyń ishinde jaqsylyq sharapatymen estigen jannyń kóńilin gúldendiretin «Biz birgemiz», «Jaqynyńa janashyr bol», «Ardagerlerdi ardaqtaıyq», «Biz úıdemiz» tárizdi kómekti qajet etetin kóptegen adamdarǵa áleýmettik kómek kórsetilgen ataýly sharalardy atap aıtýǵa bolady. Psıhologııalyq trenıngter, aýrýdyń aldyn alýǵa baǵyttalǵan túsinik sharalary, dóńgelek ústel men úmit otyn tutandyratyn júzdesýler ótkizildi.
Indet órshigen tusta qasqaldaqtyń qanyndaı bolyp taptyrmaı ketken betperdelerdi tegin taratty. Halyqqa dert sheńgeline túspeý úshin karantın talaptaryn qalaı saqtaý kerek týraly túsinik jumystaryn júrgizdi. Áleýmettik beınebaıandar daıyndap, jalpaq jurtty saqtandyrýǵa tyrysty.
Sharapatty sharýaǵa aýyl jastarynyń qosqan úlesi de zor. Olar «Biz birgemiz» respýblıkalyq aksııasyn jumyla qoldap, aýyl-aımaqtaǵy janashyrlyqqa zárý adamdardy qamqorlyqtaryna aldy. Birinshi kezekte qajet taýarlardy, karantınnen qorǵanatyn quraldardy jetkizip berip otyrdy. Nátıjesinde 167 otbasyna naqty kómek kórsetildi. Jumyspen qamtý ortalyǵy arqyly halyqqa kómektesýge umtylǵan júzge jýyq jastar aýdannyń árbir aýyldyq jerlerinde monıtorıng júrgizdi. Aýyl adamdarynyń bir-biriniń jaıyn jaqsy bilgendikten qamqorlyqtan muqtaj eshkim de kómeksiz qalǵan joq. Eriktiler «Jomart júrek» atty top qurdy. Ondaǵy negizgi maqsat – júdegen jandardy júrek jylýymen jylytý. Joǵaryda atalǵan topqa el turǵyndary ózderi tutynbaıtyn, biraq sý jańa zattaryn ákelip tabys ete bastady. Bálkim bireýlerge qajet bolyp qalar. Osylaısha, azyq-túlik, kıim-keshek, tipti jıhazǵa deıin jınaldy. Shyn máninde bul ıelerine qajetsiz zattar emes, aq kóńil adamdardyń ózgege kómek kórsetsem degen shynaıy aq tilegi ispetti edi. Al bir ortalyqta jınalǵan zattar kópbalaly, áleýmettik jaǵynan az qamtamasyz etilgen otbasylaryna teńdeı etip bólinip berildi. Shapaǵat nuryna bólengen sharýa áli de jalǵasýda.
Búginde aýdan jastary «Erikti eldiń ishinde» aıdarymen áleýmettik jeliler arqyly jomart jandardyń jaqsy isin oń qyrynan nasıhattaýda. Qamqorlyq jaıly qulaqtanǵan aýdannyń ózge de jastary saýapty iske úles qosýǵa umtylýda. Adamdar ǵana emes, tabıǵat ta tańnyń móldir shyǵyndaı taza nıetti jastardyń jan sáýlesi arqyly aıryqsha ádemi ajarǵa ıe bolyp, nurlana túsýde. «Taza álem» aksııasy aıasynda aýdannyń barlyq eldi mekenderi abattandyrylyp, kúl-qoqystan tazartyldy, aǵash kóshetteri egildi. Qorshaǵan ortaǵa qııanat jasamaý týraly beınebaıandardyń nátıjesinde áserli áńgimeler aıtyldy.
Jaqsynyń janashyrlary el birligi úshin, halyqtyń qamy úshin áli de aıanbaı eńbek etýde. Eriktilerdiń erlikke para-par sharýasy osy kúni el aýzynda iltıpatpen atalady.
Aqmola oblysy,
Jaqsy aýdany
