At qulaǵynda oınaıtyn qyz

Asyl Jambyl aýdanyndaǵy Ozernyı aýylynyń týmasy. Ke­zinde Erbol Sháımerdenov aǵa­myz osy túkpirdegi aýyldyń mektebin kúmis medalmen biti­rip, alystaǵy Almatyny ba­ǵyndyrǵan edi. «At aýnaǵan jerde túk qalady» degendeı qy­zymyzdyń qaısarlyǵy da eldi eleń etkizip otyr.

Nur-Sultan qalasynda ınformatıka boıynsha joǵary bilim alyp kelgen Asyl aýylyn­da muǵalim bolyp isteıdi. Áleý­mettik jelide aýyldaǵy óziniń ómiri týraly jazyp, rolıkter túsirip, salyp turady. Mek­teptegi jumysynan shyqqan soń ol ákesimen birge jylqy ba­ǵysady. Eń bastysy attyń qula­ǵynda oınaıdy. 24 jastaǵy boıjetken sırk ártisterinen birde kem emes, jortqan attyń ústinde tik túregep júre beredi. Sonymen birge keń jazırany ásem kúıge bólep, attyń ústinde turyp, qa­zaqtyń halyq ánderin syńsyta aıtyp, erkin shyrqaǵanda búkil dala án salǵandaı áser qal­dyrady. Astyna minip júr­gen esti sáıgúlik qyzdyń bar­lyq qylyqtaryna kóngen, mańdaıynan sıpaǵanda, jalyn taraǵanda typyr etpeı, oǵan súıkenip, erkelep turady.

Qyzdyń jylqyǵa qumarlyǵy 5 jasynan bastalypty. Ákesimen birge jylqy baǵýǵa shyǵyp ol kúni boıy attan túspeıdi eken. Qyzdyń sheshesi onyń qumar­lyǵyn unatpasa da qoıdyra almapty. «Mektepten kele sala tamaq ta ishpeı, atqa júgiretin ony qalaı qoıdyraıyn. At qyz balanyń qoly emes ekenin talaı ret aıttym. Biraq báribir ákesiniń qasyna júgirip, atqumarlyǵyn qoımady. Júregi qalap turǵan soń qolyn qaqpaıyn dep oıladym», deıdi anasy Márzııa.

Al ákesi Esenǵalı qyzynyń ózine serik bolyp, janynda jú­retinine, jylqyǵa degen aı­ryqsha qushtarlyǵy bar ekenine kerisinshe súısinip qaraıtyn sekildi. «Jasynan atqa qushtar boldy. Aldymen atqa mingizshi dep qyń­qyldaıtyn. Al erge otyra alatyn kezden beri attan túsken joq. Bálkı meniń atqu­mar­lyǵym oǵan juqqan shyǵar», dep jymııady ol. Ishinen masattanyp turǵany da kórinip tur.

Qyzdyń ózi jylqyny jasynan jaqsy kóretindigin aıtady. «Attyń ústinde ózimniń ózgerip, erekshe kúsh alyp, qulshynyp ketetinimdi sezinemin. Basyma da túrli arman-qııaldar, naqty jos­parlar kelip, fantazııam sharyqtap, ıdeıalar qaptap bere­di. Bul meniń jylqyǵa degen mahabbatymnan shyǵar. Qazir minip, báıgege shaýyp júrgen eki júırik atym bar. Olar da meni jaqsy kóredi, kúnde oqyranyp qarsy alady», deıdi qyz.

Áleýmettik jeliler arqyly tanylǵan ony sheteldik BAQ-tar da túsirip jatyr. Jýyrda «Azattyq» radıosynyń tilshisi de arnaıy kelip, túsirip ke­tipti. Asyl óziniń tanylýyn tý­rıstik jobany qolǵa alý­ǵa ushtastyratynyn aıtady. Ar­naıy týrfırma ashyp, shetel­dikterge keń dalamyzdyń qasıetin kórsetip, adamnyń eń alǵash ret jylqyny qolǵa úıretken ólkesin tanystyrǵysy keletinin, kınoǵa túsip, keńirek tanymal bolǵysy keletinin aıtty ol. Biz onyń armandary oryndalyp, sáttilik serigi bolǵanyn tileımiz.

Soltústik Qazaqstan oblysy