«Qaýipti vırýstyń taralýy kúnnen-kúnge órshýde. Bul – barshamyzdy qatty alańdatyp otyrǵan jaǵdaı. Osy kezgedeıin vaksınalaýǵa qatysty birneshe jıyn ótti. Naqty tapsyrmalar berildi. Biraq, jumys qarqyny áli de tómen. Buǵan basty sebep – vaksınalaýǵa qatysty jumystyń qajetti deńgeıde uıymdastyrylmaýy» dedi Mahambet Dosmuhambetov.
Ákimniń aıtýynsha, vaksınalaý – indettiń aldyn alýǵa ǵana emes, ujymdyq ımmýnıtetti qalyptastyrýdyń jalǵyz joly. Sol sebepten, basqarma basshylaryna baǵynysty mekemelerdegi qyzmetkerlerdi vaksınasııalaý deńgeıin 90 paıyzǵa deıin jetkizý júkteldi.
«Bárińizge kemshilikterdi túzetý úshin eki apta ýaqyt beremin. Jumys jolǵa qoıylmasa, sizderge qatysty táriptik jaýapkershilik qaralatyn bolady», dedi oblys ákimi.
Oblystyq densaýlyq saqtaý basqarmasynyń basshysy Ashan Baıdýálıevtiń málimetinshe, koronavırýs ınfeksııasyna qarsy vaksınalaýdyń kúndelikti josparyna ózgeris engizilip, kún saıyn vaksına alatyndar sany 1050-den 3500-ge deıin artpaq.
«О́ńirge I komponent úshin 170 295 doza, II komponentke arnalǵan 138 695 doza vaksına jetkizildi. Sońǵy 10 kúnde vaksına alǵan adamdardyń sany 13,1%-ǵa artyp otyr. Vaksınalaýǵa jatatyn kontıngentter arasynda eń joǵary kórsetkish quqyq qorǵaý organdaryna (170%), al, eń tómengi kórsetkish stýdentter (38,3%) arasynda baıqalyp otyr», deıdi Ashan Baıdýálıev.
Onyń pikirinshe, ınfeksııalyq stasıonarlardyń jansaqtaý bóliminde jatqan naýqastarǵa qatysty taldaý júrgizilgen. Qazir stasıonarlarda koronavırýs ınfeksııasyn juqtyrǵan 1 676 naýqas emdelip jatyr. Al, jansaqtaý bóliminde 95 naýqas oqshaýlanǵan. Jaǵdaıy aýyr naýqastardyń birde-biri vaksına almaǵan.
«Jylyoı aýdanynda turǵyndardyń 13,7 vaksına saldyrǵan. Al, Maqatta – 22,5, Isataıda – 28,7, Qyzylqoǵa aýdany turǵyndarynyń 28,1 paıyzy vaksına ektirgen», deıdi Ashan Baıdýálıev.
Osyǵan baılanysty oblys ákimi Mahambet Dosmuhambetov Jylyoı jáne Maqat aýdanynyń ákimderine jumysty tıisti deńgeıde oryndamaǵany úshin salaǵa jetekshilik etetin orynbasarlaryna qatysty tártiptik shara qoldanýdy tapsyrdy.
«Ár eki kún saıyn Atyraý qalasy men aýdandar, salalyq uıymdar, kásiporyndar jáne basqa da mekemeler vaksınalaý týraly baıandaýy qajet. Vaksınamen qamtýdyń táýliktik kórsetkishin jaqsartý úshin naqty sharalar qabyldaý, aýdandardaǵy vaksınalaý qarqynyn joǵarylatý úshin ádistemelik kómek kórsetý kerek. Respýblıkalyq vaksına júrgizý jónindegi aqparattyq-túsindirý naýqanyn iske asyrýǵa arnalǵan jol kartasyn oblystyq deńgeıde jasaqtap, 2 kún ishinde bekitken jón», dedi Mahambet Dosmuhambetov.
