Búgin, 20 qańtarda Ońtústik Qazaqstan oblysynyń ákimdiginde Prezıdent Nursultan Nazarbaevtyń «Qazaqstan-2050: Bir maqsat, bir múdde, bir bolashaq» atty Joldaýynda aıtylǵan mindetterdi jergilikti jerlerde iske asyrý joldaryn naqtylaý maqsatynda aktıv jıyny ótti. Bul týraly oblys ákiminiń baspasóz qyzmeti habarlady.
Jıynda oblys ákimi Asqar Myrzahmetov (1-sýrette) kún tártibindegi másele oraı baıandama jasady. Ol óz sózinde: «Jańa Joldaý Qazaqstannyń jańa belesterdi baǵyndyrýyna, joǵary ekonomıkalyq kórsetkishterge qol jetkizip, qarqyndy damyǵan memleketke aınalýyna jol ashady... Jerlesterimiz ejelden eńbekqorlyǵymen, tatýlyǵymen, básekege qabilettiligimen tanymal. Bul júktelgen jańa mindetterdiń oryndalýyna úlken negiz bolady», - dep atap kórsetti.
Aımaq basshysy Elbasynyń Joldaýda shaǵyn jáne orta bıznes kólemin 2050 jylǵa qaraı ezimizdiń jalpy ishki óniminiń 50 paıyzyn qamtamasyz etetin deńgeıge jetkizý qajettigin aıtqanyn mysalǵa keltirdi. Oblystyń bul saladaǵy tabystary jyl sanap artyp keledi. Bıyl oblys naryǵynda belsendi jumys isteıtin shaǵyn bıznes sýbektileriniń sany 125,8 myń birlikti qurady. Al olar óndirgen ónim − 534,1 mlrd. qurap, jumyspen qamtylǵandar 279,6 myń adamǵa jetti.
«Bıznestiń jol kartasy-2020» baǵdarlamasy aıasynda kásipkerlikti qoldaý úshin qazynadan 6,9 mlrd. teńge qarastyryldy. Bul turǵyda oblysymyzdyń Elbasy tapsyrmasyn oryndaýda múmkindigi mol.
Joldaýda aıtylǵan áleýmettik salaǵa qatysty mindetter óńirde josparǵa saı júzege asady. Osy jyly 107 bilim nysanynyń qurylysyna 32,4 mlrd. qarjy bólindi. Jyl sońyna deıin 50 nysan el ıgiligine beriledi. Osylaısha 28 apatty, 3 úsh aýysymdy mekteptiń máselesin sheshiledi. Densaýlyq saqtaý salasynda jańa 42 nysan salynady.
2014 jyly oblys aýmaǵyndaǵy múgedekterge kórsetiletin áleýmettik qoldaýdy jaqsartý úshin 1,2 mlrd. teńge qarjy qarastyryldy. Sondaı-aq, Saryaǵash, Maqtaral, Saıram, Túlkibas aýdandarynda múgedekterge áleýmettik qyzmet kórsetý ortalyqtary ashylady.
Joldaýdaǵy Shymkenttiń iri qalalar aglomerasııasyna engizilip, zamanaýı ýrbanıstik ortalyqqa aınalýy ońtústikqazaqstandyqtarǵa zor mindet júkteıdi. Bul baǵytta naqty jumystar jasalýda, oblys ortalyǵyna 40 eldi meken qosylyp, halyq sany 145 myńǵa artyp otyr.
Halqy eńbekshil eldiń ekonomıkasy óristi, qoǵamy turaqty, turmysy túzý bolatyny belgili. Búgingi jahandaný dáýiri júrip, tehnıkalyq damý úderisteri qarqyn alǵan kezeńde aldymyzǵa strategııalyq maqsattar qoıyp, álemde ózindik orny, asqaq bedeli bar memleket qurý basty mindet. Memleket basshysy jarııalaǵan saıası qujattyń máni de osynda. Qazaqstandyqtar bir ıdeıaǵa toptasyp, ortaq maqsat pen múdde úshin, kemel keleshek úshin eńbek eteri sózsiz.
Sáken Maılybaı.
Derekkóz, sýretter: Ońtústik Qazaqstan oblysy ákiminiń baspasóz qyzmeti.
