Qazaqstan Prezıdenti sóz basynda Mýn Chje Inge Koreıa Respýblıkasyna memlekettik sapardy jáne osy is-sharany uıymdastyrǵany úshin rızashylyǵyn bildirdi.
Memleket basshysy Seýge saparynyń baǵdarlamasy asa tyǵyz ekenin atap ótti.
«20-shy jáne 21-shi ǵasyrdaǵy tarıhqa kóz júgirtsek, qazaqtar men koreılerdiń júrip ótken joly kúrdeli, úlken synaqtardan synbaı ótkenin baıqaýǵa bolady.
Dálirek aıtqanda Azamattyq soǵysyna da, Uly Otan soǵysyna da qatysty. Babalarymyz kóptegen syn tezinen ótti. Soǵan qaramastan, bizdiń halyqtarymyz bir birine ıyq tirestire otyryp, qıynshylyqtardy jeńe bildi. Qazaqtar men koreıler baýyrlas halyqtarǵa aınaldy», dedi Memleket basshysy.
Bul rette Qasym-Jomart Toqaev Ońtústik Koreıa bizdiń eldiń iri syrtqy saýda jáne ekonomıkalyq áriptesteriniń biri ekenin atap ótti. Qazaqstan Prezıdenti koreıalyq bıznes ókilderiniń azyq-túlik, taý-ken baıytý, avtomobıl jáne ekonomıkanyń basqa da sektorynda tabysty eńbek etip jatqanyn atap ótti.
Qasym-Jomart Toqaevtyń aıtýynsha, qazaq-koreı yntymaqtastyǵynyń zor áleýeti áli de tolyq ashylmaǵan. Memleket basshysy Qazaqstan óziniń 19 mıllıondyq naryǵynan bólek, Eýrazııalyq ekonomıkalyq odaqqa kirý úshin tıimdi alańnyń qyzmetin atqara alady dep esepteıdi.
«Qazaqstan 75 mıllıon turǵyny bar Ortalyq Azııanyń ekonomıkalyq turǵydan eń damyǵan eli bolyp esepteledi. Zamanaýı quqyqtyq, salyqtyq jáne qarjylyq júıe men Ortalyq Azııadaǵy mindetti tólemdersiz saýda júıesi, Qazaqstandy osy aımaqta jumys isteýge eń qolaıly alańǵa aınaldyryp otyr», dedi Memleket basshysy.
Prezıdent bizdiń eldegi ınvestısııalyq ahýal týraly aıta kele, koreı tarapyn jańa erejelermen, ıaǵnı, jeke qoldaý sharalary, zańnamalyq turaqtylyq jáne strategııalyq ınvestorlarǵa erekshe jaǵdaı jasaýdy qamtıtyn «Strategııalyq ınvestısııalyq kelisimmen» tanystyrdy.
Memleket basshysynyń aıtýynsha, bul tetik «Samal jel» ekonomıkalyq yntymaqtastyq tujyrymdamasyn júzege asyrýǵa da negiz bolmaq.
Sonymen qatar Qasym-Jomart Toqaev jer qoınaýyn paıdalaný, ınnovasııalar men jańa tehnologııalar, atom, balamaly jáne jańartylatyn qýat kózderi, munaı-gaz, mashına jasaý salalarynda tıimdi jobalar júzege asyrýǵa múmkindik mol ekenin atap ótti.
Memleket basshysy bulardyń ózi yntymaqtastyq ornatýǵa bolatyn barlyq baǵyt emes ekenin aıtty. Ol metallýrgııa, avtomobıl jáne azyq-túlik óndirisi, densaýlyq saqtaý jáne bilim salalarynda Ońtústik Koreıanyń úlken jetistikterge jetkenin atap ótti.
Prezıdent osy asa qıyn jolda jınaqtaǵan tájirıbe, bilim men tehnologııalar Qazaqstanda da úlken suranysta ekenin jetkizdi.
Onyń aıtýynsha, Qazaqstan búginde ekonomıkany sıfrlandyrý jáne jańa tehnologııalarǵa kóshirý kezeńinde.
«Biz ınvestısııalyq jáne tehnologııalyq yntymaqtastyqtyń barlyq baǵyty boıynsha jumys isteýge daıynbyz. Ol úshin qarjylyq ta, materıaldyq ta múmkindikter men damyǵan ınfraqurylym bar.
Eń bastysy – basshylyqtyń saıası nıeti túzý, memleketterimizdiń arasynda tatý baılanys ornaǵan. Sondyqtan, men bizdiń yntymaqtastyǵymyzdyń bolashaǵyna zor úmit artamyn. Qazaqstan Respýblıkasynyń Prezıdenti retinde qol jetkizilgen kelisimderdiń júzege asyrylýyna jáne jalpy elderimizdiń ekonomıkalyq yntymaqtastyǵyn nyǵaıtýǵa baǵyttalǵan barlyq is-qımyldarǵa monıtorıng júrgizip, jiti baqylap otyratynymdy taǵy qaıtalap aıtamyn», dedi Qasym-Jomart Toqaev.
Koreıa Prezıdenti Mýn Chje In óz sózinde Qazaqstanmen birlesken ınvestısııalyq jobalardyń júzege asyrylýyna Ońtústik Koreıa Úkimet tarapynan tolyq qoldaý bolatynyn aıtty.
Is-shara barysynda koreıalyq «Hyunday Motor Company», «Samsung Electronics», «Doosan Heavy Industries & Construction», «Lotte Confectionery», «POSCO International», «Celltrion, Dongil Construction», «KOTRA» kompanııalarynyń jetekshileri sóz sóıledi. Qazaqstan tarapynan Premer-Mınıstrdiń orynbasary Roman Sklıar, «Samuryq-Qazyna» UÁQ tóraǵasy, «Kaspi.kz» AQ dırektorlar keńesiniń tóraǵasy, «Mineral Product» JShS-nyń quryltaıshysy baıandamalar jasady.
