Sýret: adebiportal.kz
Farıza Ońǵarsynova 1939 jylǵy 5 jeltoqsanda Gýrev (qazirgi Atyraý) oblysy Novobogat aýdanyna qarasty Manash aýylynda týǵan.
Eńbek jolyn 1961 jyly Gýrev memlekettik pedagogıkalyq ınstıtýtynyń til-ádebıet fakýltetin bitirip, Balyqshy aýdanynyń Erkinqala, Oktıabrdiń 40 jyldyǵy atyndaǵy qazaq mektepterinde ustazdyq etýden bastady. 1966-1968 jyldary oblystyq «Kommýnıstik eńbek» gazetinde ádebı qyzmetker bolyp istedi. Aqynnyń qalyń jurtshylyqqa keńinen tanylýy onyń 1968-1970 jyldary respýblıkalyq «Lenınshil jas» gazetiniń batys oblystardaǵy menshikti tilshisi bolǵan kezinde qalyptasty. Sondyqtan ol 1970 jyly birden respýblıkalyq «Qazaqstan pıoneri» gazetine bas redaktor bolyp keldi. 1978 jyly jańadan ashylǵan «Pıoner» jýrnalynyń irgesin basshy retinde óz qolymen kóterdi. Keıin tap osylaı «Aq jelken» jýrnalyn ómirge keltirdi.
Farıza Ońǵarsynova táýelsiz elimizdiń qoǵamdyq ómirine de belsene aralasty. Ol 1996-2004 jyldary Parlament Májilisiniń depýtaty bolyp saılandy.
Aqynnyń alǵashqy óleńderi baspasóz betterinde 1958 jyldan bastap jaryqqa shyǵa bastady. Onyń ár jyldary 20-dan astam óleńder jınaqtary, ocherkteri, tańdamaly shyǵarmalary, «Bizdiń Kamshat» atty povesi, aýdarmalary «Jazýshy», «Jalyn», «Molodaıa gvardııa» baspalarynan jaryq kórdi. Orys, týysqan respýblıkalar aqyndarynyń, Chılı aqyny P. Nerýdanyń jyrlaryn, keıbir dramalyq shyǵarmalardy qazaq tiline aýdardy. Al 1984 jyly «Úıim - meniń Otanym», «Mańǵystaý monologtary», «Revolıýsııa jáne men» atty óleńder toptamalary úshin Qazaq KSR Memlekettik syılyǵynyń laýreaty atandy.
О́mirden qazaq aqyn qyzdary kóshbasylarynyń biri bolǵan asa talantty aqyn ketip barady. Oqyrman qaýymnyń onyń shyǵarmashylyǵynan kúteri áli de kóp edi. Biraq taǵdyrdyń isi osylaı boldy.
Sondyqtan endigi aıtarymyz: jatqan jerińiz jaıly, topyraǵyńyz torqa bolsyn, qazaqtyń aıbyndy aqyn qyzy!
«Egemen Qazaqstan».
