Keshe Ortalyq telekommýnıkasııalar qyzmetiniń minberinen Prezıdent Ákimshiligi Quqyq qorǵaý júıesi bóliminiń meńgerýshisi Alık Shpekbaev jýrnalısterge brıfıng berip, quqyq qorǵaý organdaryn reformalaý barysy, sonymen qatar, Memleket basshysynyń «Qazaqstan-2050» Strategııasy men 2014 jylǵy 17 qańtardaǵy Joldaýynan týyndaıtyn tapsyrmalardy iske asyrý jóninde aıtty.
Keshe Ortalyq telekommýnıkasııalar qyzmetiniń minberinen Prezıdent Ákimshiligi Quqyq qorǵaý júıesi bóliminiń meńgerýshisi Alık Shpekbaev jýrnalısterge brıfıng berip, quqyq qorǵaý organdaryn reformalaý barysy, sonymen qatar, Memleket basshysynyń «Qazaqstan-2050» Strategııasy men 2014 jylǵy 17 qańtardaǵy Joldaýynan týyndaıtyn tapsyrmalardy iske asyrý jóninde aıtty.
Memleket basshysy osy jylǵy 17 qańtardaǵy «Qazaqstan joly – 2050: bir maqsat, bir múdde, bir bolashaq» atty Joldaýynda eń basty maqsat álemdegi damyǵan 30 memlekettiń qataryna ený ekenin atap ótti. Osy oraıdaǵy negizgi mindet – sybaılas jemqorlyqqa qarsy jańa strategııany qalyptastyrý jáne ony iske asyrý. Mine, osy mindetke baılanysty quqyq qorǵaý organdary qyzmetiniń tıimdiligin arttyrý boıynsha naqty tapsyrmalar berdi, dedi A.Shpekbaev.
Bul tapsyrmalar Elbasynyń Jarlyǵymen 2013 jyldyń 31 jeltoqsanynda bekitilgen Qazaqstannyń quqyq qorǵaý júıesin odan ári jańǵyrtýdyń memlekettik baǵdarlamasy sheńberinde iske asatyn bolady. Osy baǵdarlamany biz quqyq qorǵaý organdary jumysynyń mazmunyn túbegeıli ózgertýge múmkindik beretin qujat dep sanaımyz, dedi ol.
Odan ári A.Shpekbaev quqyq tártibi júıesiniń damýy eldegi ekonomıkalyq jáne áleýmettik salanyń jetildirilýine qaraǵanda ájeptáýir artta qalyp kelgenin aıtyp, bul máselege Elbasy óziniń 2010 jylǵy Joldaýynda-aq mán bergenin atap ótti. Osydan keıin Prezıdent «Qazaqstan Respýblıkasynda quqyq qorǵaý isi jáne sot júıesi tıimdiligin arttyrý sharalary týraly» Jarlyqqa 2010 jyldyń 17 tamyzynda qol qoıyp, elde keń aýqymdaǵy reforma bastalǵanyn jetkizdi.
A.Shpekbaev osy reformanyń aıasynda atqarylǵan jumystarǵa birshama toqtalyp ótti. Sonyń ishinde quqyq buzýshylyqqa qarsy zańdardy izgilendirý nátıjesinde elimizde túrmege otyrǵyzylǵan adamdar sany 25 paıyzǵa deıin azaıǵanyn aıtty. Tergeý sharalarynyń jeńildetilip, artyq áýre-sarsańǵa salýshylyqtardyń azaıtylýy arqyly sotqa jiberilgen qylmystyq ister IIM tarapynan – 27, qarjy polısııasy tarapynan 19 paıyz ǵana boldy. Osynyń arqasynda quqyq qorǵaý organdary kúsh-jigerlerin aýyr jáne asa aýyr qylmystardy ashýǵa kóbirek jumsaýǵa qol jetkizdi.
Aryz-shaǵymdardy elektrondy esepteý júıesin engizgennen beri qylmysty jasyryp qalýshylyq, jalǵan jaqsy kórsetkishke jetýshilik azaıtyldy. Sonymen qatar, 2013 jyly qylmysty jasyrmaq bolǵan, ıaǵnı esepteý-tirkeý tártibin buzǵan qyzmetkerlerge qatysty 108 qylmystyq is qozǵaldy. Osyndaı sharalardyń nátıjesinde jyl saıyn jasyrylyp kelgen 200 myńnan artyq qylmystyń bary anyqtaldy. Sondaı-aq, A.Shpekbaev kásipkerlerge ákimshilik qysym kórsetýdi azaıtý maqsatymen prokýratýra organdarynda zańdardyń durys oryndalýyn qadaǵalaıtyn bólimniń ashylǵanyn aıtty.
Aýqymdy deńgeıde ótkizilgen attestattaýdyń arqasynda quqyq qorǵaý organdary qyzmetkerleriniń jáne olardyń basshylarynyń kásibı sapasyn arttyrýǵa qol jetkizildi. Demılıtarızasııalaý sharasynyń nátıjesinde 9 myńǵa jýyq qyzmetker pogonyn sheshti, munyń ózi azamattardyń quqyq qorǵaý organdaryna degen senimin arttyrdy. Endi bizdiń aldymyzdaǵy mindet – quqyq qorǵaý organdaryn «Qazaqstan-2050» Strategııasyna sáıkes jańǵyrtý. Birinshi kezekte bizdiń aldymyzǵa quqyq qorǵaý júıesin 2020 jylǵa deıin joǵary halyqaralyq standarttarǵa saı etý mindeti qoıyldy. Bul – barlyq jańǵyrtýlardyń sıpatyn anyqtaıtyn eń mańyzdy maqsat bolyp tabylady.
Osylaı degen A.Shpekbaev ony iske asyrýdyń negizgi baǵyttaryn atap ótti. Sonyń ishinde 4 jańa kodekstiń jobasy ázirlenip, Parlament qaraýyna joldanǵanyn aıtty. Olar: Qylmystyq is júrgizý, Qylmystyq, Qylmystyq-atqarý jáne Ákimshilik quqyq buzýshylyqtar týraly kodekster.
Qylmystyq sot isin júrgizý júıesiniń tujyrymdamalyq reformasy quqyq qorǵaý organdary qyzmetiniń mazmuny men sıpatyn ózgertýdi talap etedi. Osyǵan baılanysty, Quqyq qorǵaý júıesin odan ári jańǵyrtýdyń 2014-2020 jyldarǵa arnalǵan memlekettik baǵdarlamasy ázirlenip, bekitildi. Buǵan qosa, Kadrlyq saıasat tujyrymdamasy maquldandy, ony biz atalǵan baǵdarlamany iske asyrýdyń negizgi quraly retinde qarastyramyz, deı kelip, sheshen qazir reforma óziniń sheshýshi satysyna kóshkenin jetkizdi.
Sóziniń sońynda A.Shpekbaev 2020 jylǵa qaraı Qazaqstanda joǵary halyqaralyq standarttarǵa saı keletin quqyq qorǵaý júıesi qalyptasatynyn nyq túrde aıtty. Ol úshin barlyq qajetti jaǵdaılar jasalýda.
Jaqsybaı SAMRAT,
«Egemen Qazaqstan».
