«Nur Otan» fraksııasynyń depýtaty, Parlament Májilisiniń Zańnama jáne sot-quqyqtyq reforma komıtetiniń múshesi Názılá Razzaq Saıası keńes Bıýrosynyń sheshimimen partııanyń Quqyqtyq keńesiniń tóraǵasy bolyp taǵaıyndaldy», dep jazdy ol Twitter-degi paraqshasynda.
Sondaı-aq, Baýyrjan Baıbek Joǵarǵy Sottyń sýdıasy bolyp saılanǵan Quqyqtyq keńestiń aldyńǵy tóraǵasy Qanat Mýsınge partııa basshylyǵy atynan alǵys aıtty.
Partııanyń baspasóz qyzmeti atap ótkendeı, Quqyqtyq keńestiń negizgi mindetteri – «Ádiletti quqyq qorǵaý júıesi» baǵyty boıynsha saılaýaldy ýádelerdiń iske asyrylýyn baqylaý, partııa basymdyqtaryn eskere otyryp, zańnamany jetildirý jáne t.b.
Názılá Razzaq – zań ǵylymdarynyń doktory, sot tóreligi jáne balalar quqyǵyn qorǵaý organdary máseleleri boıynsha 35-ten astam ǵylymı eńbegi bar, olardyń birqatary halyqaralyq basylymdarda jaryq kórgen. Qazaqstanda bala quqyqtary jónindegi ýákil ınstıtýtyn endirýge bastamashylardyń biri bolǵan.
Ár jyldary Jambyl oblystyq soty alqasynyń hatshysy, Atyraý qalasy sotynyń jáne Atyraý oblysynyń mamandandyrylǵan aýdanaralyq ekonomıkalyq sotynyń sýdıasy bolǵan, sondaı-aq Joǵarǵy Sot apparatynda jumys istegen.
2014 – 2021 jyldary elordada kámeletke tolmaǵandardyń isteri jónindegi mamandandyrylǵan aýdanaralyq sotynyń tóraǵasy, Joǵarǵy Sot janyndaǵy Sot tóreligi akademııasynyń vıse-rektory, «Nur Otan» partııasynyń Respýblıkalyq qoǵamdyq qabyldaý bólmesiniń meńgerýshisi qyzmetterin atqarǵan.
2021 jyldan bastap «Nur Otan» fraksııasynyń depýtaty, Parlament Májilisiniń Zańnama jáne sot-quqyqtyq reforma komıtetiniń múshesi, sondaı-aq Quqyqtyq keńes tóraǵasynyń orynbasary boldy.
