Máselen, qyrkúıektiń alǵashqy jumasynda árqaısysy 200 myń teńgeni quraıtyn 10 sertıfıkattyń ıeleri ataldy. Budan soń 6 qyrkúıekte turǵyndardy yntalandyrý maqsatyndaǵy aqshalaı utys oıynynyń 1 mln teńgelik alty sertıfıkaty oınatyldy. Bul kezeńge vaksına saldyrǵan 87 252 adam qatysty. Kezdeısoq sandardy tańdaý arqyly jergilikti telearnanyń tikeleı efırinde ótken aqshalaı utys oıynyn táýelsiz baqylaýshylar qadaǵalap otyrdy.
– Bir kúngi utys oıynynyń nátıjesinde Jylyoı aýdanynyń turǵyndary Mereke Dúzelgenov, Ádilbek Qamıdolla, Qurmanǵazy aýdanynan Altyn Sársenova, Atyraý qalasynda turatyn Jomart Jumabekov, Gúlnaz Dostanova, Aıman Ábıeva jeńimpaz atanyp, árqaısysy 1 mln teńgeniń sertıfıkatyn ıelendi, – deıdi «Azamattyq Alıans» ZTB jetekshisi Álibek Semǵalıev.
Vaksına saldyryp, bir kúnde mıllıoner atanǵannyń biri – Jomart Jumabekov. Alaıda ol qarjylaı sertıfıkatty tapsyrý sharasyna qatysa almady. Sol sebepten, sertıfıkat onyń jubaıy Aınur Fazylovaǵa berildi.
– Álem elderinde mundaı qaýipti vırýstyń burynda da taralǵanyn bilemiz ǵoı. Biraq bul jolǵy indettiń órshýi ońaılyqpen basylar emes. Munyń aldyn alý úshin vaksına saldyrýdyń mańyzy artyp tur. Sondyqtan koronavırýsqa qarsy vaksına ektirgende aqsha utýdy maqsat tutpadyq. Degenmen, aksııadan utyp alǵan mıllıon teńge artyq etpeıdi ǵoı, – deıdi A.Fazylova.
Dál osyndaı qomaqty bolmaǵanmen, yntalandyrý sharasyn H.Dosmuhamedov atyndaǵy Atyraý ýnıversıteti de ótkizdi. Ýnıversıtet rektory Salamat Idrısovtyń aıtýynsha, oqytýshylar men qyzmetkerlerdiń, stýdentterdiń densaýlyǵyn saqtaý úshin vaksına saldyrýdyń mańyzyna basa kóńil bólinip otyr.
– Maqsatymyz – ujymdyq ımmýnıtetti qalyptastyrý. О́ıtkeni jahan jurtyna qaýip tóndirgen koronavırýs ınfeksııasynan vaksına ǵana qorǵaı alady. Osy oraıda stýdentter arasynda «Vaksına al da, utys oıynyna qatys» aksııasyn ótkizdik. Aksııaǵa 1 shilde men 25 tamyz aralyǵynda vaksına saldyrǵan 1 333 stýdent qatysty, – deıdi S.Idrısov.
Utys oıynynyń nátıjesinde 50 stýdent jataqhanaǵa ornalasý úshin 50 paıyzdyq jeńildikti, 49 stýdent shet tilin úıretetin tegin kýrsqa qatysý joldamasyn utyp aldy. Al 30 stýdent Nur-Sultan qalasyna tegin saıahattaıtyn boldy. Sondaı-aq 3 stýdentke bir jyldyq oqý aqysyna 30, 50 jáne 100 paıyzdyq jeńildik berildi. Oqý ordasynyń 5 shákirti noýtbýk ıelendi.
Osyndaı yntalandyrý sharalary koronavırýs ınfeksııasyna qarsy vaksına saldyrýshylar qataryn kóbeıtip otyr. Oblystyq densaýlyq saqtaý basqarmasynyń baspasóz qyzmeti taratqan aqparatqa qaraǵanda, 7 qyrkúıekte 1 659 atyraýlyq turǵyn ekpe alǵan. Onyń arasynda 43 pedagog, 30 stýdent, 15 dáriger, 28 memlekettik qyzmetshi, sozylmaly aýrýy bar 141 pasıent, 1 397 jergilikti turǵyn men quqyq qorǵaý organdarynyń 4 qyzmetkeri bar. Al 1 aqpannan beri vaksınalardyń birinshi komponentin saldyrǵandar sany 205 163 adamdy qurady. Vaksınalardyń ekinshi komponentin 152 762 adam saldyrǵan.
Atyraý oblysy
