Úkimet basshysy «Aıýsaı» jáne «Aqsaı» sel ustaıtyn bógetteriniń, «Qarǵaly» sý tartý qurylysynyń salyný barysymen, sondaı-aq Aqsaı, Úlken jáne Kishi Almaty ózenderiniń basseınderindegi morenalyq kólderdiń jaı-kúıimen tanysty.
Sel bógeıtin «Aıýsaı» jáne «Aqsaı» bógetterin salý Ile Alataýy ulttyq tabıǵı parkiniń bir bóligin, Almaty GES kaskadynyń obektilerin, Almaty qalasynyń avtojolyn – «Alma Arasan» sanatorııin, Almaty qalasynyń Naýryzbaı aýdanyn sel tasqynynan ınjenerlik qorǵaýdy qamtamasyz etedi.
A. Mamın bógetterdiń qurylysyn belgilengen merzimde – «Aıýsaı» bógetiniń qurylysyn 2022 jylǵy qazan aıynda, «Aqsaı» bógetiniń qurylysyn 2023 jyly aıaqtaýdy tapsyrdy.
Almatydaǵy 2-JEO-ny aralaý kezinde «Samuryq-Qazyna» AQ basqarma tóraǵasy Almasadam Sátqalıev Premer-Mınıstrge megapolıste kórsetilgen iri jylý elektr stansııasyn, sondaı-aq Almaty energııa kesheniniń basqa da nysandaryn jańǵyrtý jobalarynyń iske asyrylý barysy týraly baıandady.
Atalǵan jobalardy iske asyrý atmosferaǵa zııandy zattardyń shyǵaryndylaryn jylyna 50,4 myńnan 6,7 myń tonnaǵa deıin tómendetý arqyly qorshaǵan ortaǵa áserdi barynsha azaıtýǵa, sondaı-aq stansııalardyń jıyntyq qýatyn 472 MVt-qa – 1300 MVt-qa deıin ulǵaıtýǵa múmkindik beredi.
Almaty qalasynyń ındýstrııalyq aımaǵynda Premer-Mınıstr «Bıjan et óńdeý zaýyty» JShS-da boldy. Shujyq ónimderin tolyq óndirý sıklin qamtyǵan kásiporyn táýligine 5,5 tonna ónim shyǵarady.
Úkimet basshysy sondaı-aq «KSM TehnoVID» JShS energııa tıimdi sáýlet qasbetterin shyǵaratyn zaýyttyń jumysymen tanysty. Kásiporynnyń qýaty jylyna 475 myń sharshy metr energııa únemdeıtin PVH jáne alıýmınıı profıldi konstrýksııalardy quraıdy. Zaýyt úshin zamanaýı avtomattandyrylǵan jabdyq «О́nerkásipti damytý qory» AQ arqyly lızıngtik qarjylandyrý sheńberinde satyp alyndy.
Premer-Mınıstrge «Shymbulaq» taý shańǵysy kýrortyn, «Aıýsaı» jáne «Gorelnık» vızıt-ortalyqtaryn aralaý barysynda Almaty qalasynda týrızmdi damytý jáne taýlarda týrısterdiń qaýipsizdigin qamtamasyz etý jónindegi sharalar týraly baıandaldy.
Osy jyldyń 7 aıynda megapolıstiń týrızm salasyna salynǵan ınvestısııalar 56,8 mlrd teńgeni qurady, bul ótken jyldyń sáıkes kezeńindegi kórsetkishten 2,4 ese kóp. Qalanyń týrıstik ınfraqurylymyn damytý boıynsha jobalar – qonaq úıler, glempıngtik jáne kempıngtik aımaqtar, taýlarda vızıt-ortalyqtar salý, taý joldaryn abattandyrý jáne t. b. iske asyrylýda.
Úkimet basshysy Sh. Aımanov atyndaǵy «Qazaqfılm» AQ kınostýdııasyn qaıta qurý jobasymen, sondaı-aq Almaty qalasyndaǵy 350 tósek-oryndyq stasıonary bar QR Densaýlyq saqtaý mınıstrliginiń Ulttyq juqpaly aýrýlar ǵylymı ortalyǵynyń, «Jas Qanat» shaǵyn aýdanyndaǵy jalpy aýdany 233 myń sharshy metr bolatyn kóppáterli turǵyn úılerdiń qurylys barysymen tanysty.
Saparǵa Almaty qalasynyń ákimi Baqytjan Saǵyntaev, tótenshe jaǵdaılar mınıstri Iýrıı Ilın, ındýstrııa jáne ınfraqurylymdyq damý mınıstri Beıbit Atamqulov, energetıka mınıstri Maǵzum Myrzaǵalıev, ekologııa, geologııa jáne tabıǵı resýrstar mınıstri Serikqalı Brekeshev, densaýlyq saqtaý mınıstri Alekseı Soı, mádenıet jáne sport vıse-mınıstri Ǵabıdolla Ábdirahymov jáne t. b. qatysty.
