Jambyl óńirinde jomart jandar marapattaldy

Qoǵamda qaıyrymdy jandarǵa qurmet te bólek. Aımaqtaǵy Atymtaı Jomart azamattardy kópshilikke úlgi etý maqsatynda, «Rýhanı jańǵyrý» baǵdarlamasy aıasynda tórtinshi jyl qatarynan «Jomart júrek» syılyǵy tabystalyp keledi. «Jomart júrek» qaıyrymdylyq salasyndaǵy bul syılyq Qazaqstan Respýblıkasynyń Aqparat jáne qoǵamdyq damý mınıstrligimen birge elimizde qaıyrymdylyq qyzmetin damytýǵa eleýli úles qosqan qaıyrymdylyq jasaýshylardy izdestirý jáne kótermeleý, olarǵa qoǵamdyq nazar aýdarý maqsatynda taǵaıyndalǵan.

 Dástúr boıynsha, Taraz qalasyndaǵy Qaırat Rysqulbekov atyndaǵy saıabaqta Jambyl oblysynyń ákimi Berdibek Saparbaevtyń qatysýymen «Jomart júrek» syılyǵynyń oblystyq kezeńdegi laýreattaryn marapattaý rásimi ótti. Saltanatty jıynda Berdibek Saparbaev qaıyrymdylyq sharalaryn uıymdastyrýmen aınalysyp kele jatqan azamattarǵa alǵys bildirdi. «Qaıyrymdylyq – bizdiń qasıetti qundylyǵymyz. Biz qashannan bir-birimizdi qoldap, kómek kórsetip, meıirimdilik tanytyp kelemiz. Sonaý asharshylyq, soǵys kezinde de ata-babalarymyz ultyna, tiline qaramaı kópke kómek kórsetip, qol ushyn bergeni belgili. Sol ıgi dástúr áli de jalǵasyn taýyp keledi. Elbasymyzdyń «Rýhanı jańǵyrý» baǵdarlamasynyń aıasynda qolǵa alynǵan «Jomart júrek» jobasy bizdiń óńirimizde de tabysty júzege asyp keledi. Qamqorlyqty qajet etetin otbasylarǵa bizdiń demeýshilerimiz, kásipkerlerimiz únemi qaıyrymdylyq tanytyp keledi. Budan bólek, oblysta «Jomart túlek» jobasyn júzege asyrýdamyz. Ondaǵy maqsat – tabysty túlekterdi óziniń mektebine, týǵan aýylynyń áleýmettik máselelerin sheshýge, órkendetýge tartý, sondaı-aq, olardyń ónegeli ómir jolyn keıingi urpaqqa úlgi retinde usyný. Sonymen qatar, halqymyzdy birlikke úndeıtin «Asarlatyp úı salý jobasyn» qolǵa alǵan bolatynbyz. Ejelden kele jatqan ıgi dástúr – asar ádisin qaıta jańǵyrtqan bul bastama aıasynda kásipkerler men qaıyrymdy jandardyń atsalysyp, kóptegen muqtaj otbasylarǵa úı salyp berýde. Biz birligimiz ben uıymshylydyǵymyzdyń, tabandylyǵymyzdyń arqasynda barlyq qıynshylyqty eńsere alamyz», dedi oblys ákimi. Budan keıin Berdibek Saparbaev oblystyq isker áıelder qaýymdastyǵy qoǵamdyq birlestiginiń tóraıymy Merýert Leshtaevany «Jyldyń úzdik uıymy» atalymymen marapattady. Atalǵan qoǵamdyq birlestikpen Baızaq aýdanyndaǵy jarylystan zardap shekken turǵyndarǵa kómek kórsetý úshin 500 myń teńgeden astam qarajat jınalyp, oǵan Qaınar aýylyndaǵy 19 otbasyna azyq-túlik satyp alynǵan. Al, balalardy qorǵaý merekesine qalanyń qoǵamdyq birlestikterinen 110 balaǵa jalpy kólemi 1,2 mıllıon teńgege syılyqtar alyp bergen. Onyń ishinde múmkindigi shekteýli balalar men olardy tárbıelep otyrǵan ata-analar da qamtylǵan.

 Sonymen qatar, «Týǵan ólke» atalymy Erkinbek Kýatbekovke tabystaldy. Ol Talas aýdany, Maıtóbe aýylyna jalpy quny 18 mıllıon teńge bolatyn kishi fýtbol alańshasyn jáne 1,2 mıllıon teńgege Street workout salyp bergen. Al, «Jyldyń úzdik qamqorshysy» atalymyn aǵymdaǵy jyly M.Mámetova atyndaǵy №13 jalpy orta bilim beretin mektepke quny 12 mıllıon teńgeni quraıtyn «STEM» laboratorııasyn syıǵa tartqan Ábýtálip Mútáli ıelense, «Jyl tulǵasy» atalymymen Ǵalııa Ábitaeva marapattaldy. Ol bıyl 30 jylǵa jýyq baspanasyz júrgen, tórt ulynan aıyrylǵan qos qarııaǵa jáne onyń eki jetim nemeresine úı alyp berý maqsatynda kaıyrymdylyq aksııa uıymdastyryp, atalǵan turǵyndardyń baspanaly bolýyna atsalysqan. Sondaı-aq, koronavırýs indetine baılanysty karantın talaptary men tártipterin ornyqty oryndaýǵa shaqyrǵan jáne kópshiliktiń vaksına salýlary úshin el ishinde nasıhattaý, úndeý jumystaryn júrgizgen. Medısınalyq jáne sharýashylyq zattar alý úshin turǵyndarǵa úndeý tastap, 60 mıllıon teńgeden astam qarjy jınaýǵa yqpal etken. Sóıtip, Shý aýdanyndaǵy emhana jáne aýrýhanalardy jabdyqtaýǵa mol úlesin qosqan. Al, «Jyl mesenaty» atalymyn Talǵat Turǵymbaev ıelendi. Ol Jýaly aýdandyq ortalyq aýrýhanaǵa jalpy quny 109 mıllıon teńgege qajetti qural-jabdyqtar satyp alyp bergen. Onyń ishinde zamanaýı qural-jabdyqtarmen tolyqtaı jabdyqtalǵan reanımobıl, 30 ottegi ballony, 3000 dana jeke qorǵanysh kıimderi, medısınalyq qyzmetkerler jumys barysynda kúndelikti paıdalanatyn 5000 dana «KN-95» markaly respırator, 5000 dana bir ret jáne kóp ret qoldanylatyn arnaıy qorǵanys kostıýmderi, bir ret qoldanylatyn medısınalyq qolǵaptar sııaqty qorǵanys quraldaryn jáne 10 dana ottegi konsentratorlaryn alyp bergen. Jomart jandarǵa bul atalymdardy oblystyq máslıhattyń hatshysy Mahmetǵalı Sarybekov, oblystyq ardagerler keńesiniń tóraǵasy Erkinbek Soltybaev, oblystyq kásipodaqtar birlestiginiń tóraǵasy Baǵlan Qarasholaqov, M.H.Dýlatı atyndaǵy Taraz óńirlik ýnıversıtetiniń rektory Talǵat Eshenqulov tabystady. Jeńimpazdarǵa arnaıy dıplomdarmen qatar, qarjylaı syılyqtar da tabys etildi.